Matrakte Mapya Alupwilwe mu Muswelo Usangaja!
1. Lelo i bingidilwa’ka bya mu busapudi byalupwilwe mu muswelo usangaja?
1 Ku Bitango bya Distrike bya 2013 byadi na mutwe wa mwanda unena’mba “Mwanda wa Leza Kyo Kyabinebine!” kwalupwilwe matrakte atano mapya. Kadi ku ano matrakte kwabwejibwe ne Musapu wa Bulopwe No. 38, wadi na mutwe wa mwanda unena’mba, “Lelo Mufwe Ubwanya Bine Kwikala Monka Mūmi?. Kulupulwa kwa ano matrakte onso asamba kwadi kwa nsangaji. Mwanda waka ano matrakte i malupulwe namino? Kitatyi kyotwabanya’o mu busapudi bwa ku njibo ne njibo, le i muswelo’ka muyampe otukengidija mitwe ya myanda idi’po?
2. Le i kika kyalupwidilwe ano matrakte namino?
2 Kyoalupwidilwe Namino: Divule dine pa kusapula biyampe mu busapudi bwa ku njibo ne njibo, bilombanga ne kulonda ano matabula aná: (1) Kushilula mīsambo na kwipangula kipangujo kya mumwena’po muntu. (2) Kusapwila muntu mulangwe udi mu Bisonekwa. (3) Kupa mwine njibo mabuku a kutanga. (4) Kushiya kipangujo kya kwiya kulondolola kitatyi kikwabo, ne kwilaya difuku dya kwiya kumujokela. Muswelo ulupwilwe ano matrakte, i wa kwitukwasha tulonde mu muswelo upēla ano matabula onso aná.
3. I muswelo’ka otukapāna ano matrakte mapya mu busapudi?
3 Mwa Kwiengidijija: (1) Shi ubapu kwimuna muntu, mulombole kipangujo kya kutonga’po malondololo kidi pangala pa trakte, ne kumunena alombole mwalangila. (2) Pūtula trakte ne kubandaula nandi kakipindi, “Bible Unena’mba.” Mutangile kisonekwa’kyo mu Bible shi bikokejika. Shi mwine njibo udi na kitatyi, nabya mwisambilei pa kakipindi “Byokamwena’mo.” (3) Mupe trakte, ne kumukankamika atange kipindi kishele’ko pasa kumona kitatyi. (4) Kumeso kwa abe kumushiya, mulombole kipangujo kidi pa nyuma munshi mwa kakipindi “Languluka’po Bidi,” ne kwilaya nandi difuku dya kwiya kwisambila pa malondololo a mu Bible.
4. Le i muswelo’ka otukokeja kwingidija matrakte mapya mu kujokela’mo kupya?
4 Kujokela’mo kupya nako i kupēla konka. I kwingidija’tu bisonekwa bidi panyuma pa trakte mwanda wa kulondolola ku kipangujo kyowashile pomwetene dibajinji. Kumeso kwa abe kwenda, lombola mwine njibo foto ya boloshile Myanda Miyampe, kupwa mulombole boloshile ne kumufunkila kifundwa mwine mudi myanda mivule isambila pa mutwe wa mwanda, ku mfulo mupe boloshile. Shi waitabija’ye, nabya mwilayei nandi difuku dya kwiya kwisambila pa boloshile kitatyi kyosa kumujokela monka. Shi ulonge’tu bino, ubashilula kala kifundwa kya Bible! Nansha kadi, pa kyaba kya kushila mwine njibo boloshile, ubwanya kumushila trakte mukwabo ne kwilaya nandi difuku dya kwiya mwisambile’po.
5. Le matrakte adi na mvubu’ka mu mwingilo wetu?
5 Matrakte ke mengidijibwe mu mwingilo wetu mu bula bwa myaka 130 ne musubu. Nansha matrakte byoashintashinta bukata nansha bulampe, ino ao i kingidilwa kiyampe kya kupāna nakyo bukamoni. Nanshi twingidijei biyampe ano matrakte mapya mwanda wa kusalaja bininge buyuki bwa mu Bible pano pa ntanda.—Nki. 15:7a.