Tá Mutyima ku Kukimba Bifundwa bya Bible
1. Lelo kuvuija mwingilo witupele Yesu udi mu Mateo 28:19, 20 kulomba bika?
1 Yesu wētupele mwingilo wa kulonga “bāna-babwanga . . . ne kwibalombola.” (Mat. 28:19, 20) Nanshi, tusakilwa kyaba kyonso kuta mutyima ku kukimba bifundwa bya Bible, ke enkapo mu difuku ditongelwe kukimba’byo kete, mhm. Myanda ilonda’ko ikemukwasha.
2. Le i bāni botubwanya kunena twifunde nabo Bible?
2 Kimba’byo: Shi wipāne mu kukimba bifundwa bya Bible, kukabulwepo mikenga ya kusokola nansha kimo. (Mus. 11:6) Lelo kodi mutompe kunena muntu patōkelela mwifunde? Kipwilo kimo mu États-Unis kyalongele bukomo bwa kukimba’byo mu kweji mutuntulu. Bine basangele pa kushilula bifundwa bipya bya Bible 42! Kokatatana, bantu bokapempula basangela musapu bayukile amba ufundijanga myanda ya Leza. Shi ubajokela kobadi difuku dikwabo, ubulwe’po kwibanena mwifunde? Shi abapele kebyakikusansa. Ukokeja kwendelela na kutamija nsangaji. Le kodi mwipangule balondakani, babutule, bakwenu ba ku kaji, ne ba ku masomo shi bakasangela kwifunda nobe Bible? Ubwanya ne kwipangula boba bowifundanga nabo Bible shi badi na balunda nabo nansha babutule basaka kwifunda Bible.
3. Lelo i kingidilwa’ka kitukwasha tushilule bifundwa, ne tukengidija’kyo kitatyi’ka?
3 Kingidilwa kya Mvubu: Kingidilwa kya mvubu kya kushilula nakyo bifundwa bya Bible i trakte Lelo Usaka Kuyuka Bubinebine? Ukokeja kupa’ye besambi nobe nansha shi abapele mabuku makwabo. Uno trakte ukokeja kwingidijibwa potusapula mu mwaba wa busunga, mu bipito, potutuma mikanda, ne potwenda mu kujokela’mo kupya. Tubwanya kumushiya ku mobo ko ketutene bantu. Wabulwa’po kwiasela poenda mu motoka, mu nsoko, nansha ku kaji? Paje wa mfulo ulombola mu kīpi mulongelwanga kifundwa kya Bible ne mwa kushilwila’kyo mu dibuku Bifundija Bible.
4. Lelo tukengidija namani trakte Kuyuka Bubinebine mwa kushilwila kifundwa?
4 Pa kupwa kupa muntu trakte, ukokeja kumulombola bipangujo bidi pa paje umbajinji ne kumwipangula amba, “Le i kipangujo’ka pa bino kya kusangaja bininge?” Penepa mwisambilei pa bilondololwa bidi mu trakte, ne kutanga nansha kutela myanda idi pa paje wa mfulo, ishintulula mwifundilwanga Bible. Kupwa ubwanya kumulombola pene pashintulwilwe myanda mivule mu dibuku Bifundija Bible, mutambike dibuku, kupwa mwilayei mwa kwimwena monka ne kwendeleja mīsambo.
5. Mwanda waka tufwaninwe kuta mutyima ku kukimba Bifundwa bya Bible?
5 Mu mwaba wetu mukidi bantu basakasaka kwifunda byobya bine bifundija Bible. Shi tute mutyima ku kukimba bifundwa bya Bible, tukavudija mikenga ya kwimwena nsangaji ya kukwasha bakwabo batwele mu kashinda katwala ku būmi.—Mat. 7:13, 14.