Bambila Meso pa Kulonga Bana ba Bwanga
1. Lelo tufwaninwe kulonga bika shi tusaka bantu bakapande?
1 Lapolo wa mwaka wa mingilo 2014 ulombola bupyasakane bwa bantu ba Leza ne kusumininwa kobasumininwe kusapula myanda miyampe ya Bulopwe. (Mat. 24:14) Twi bafikile bantu bavule na musapu wa mu Bible kutabuka myaka ya kunyuma na busapudi bwa ku njibo ne njibo, makampanye a kwabanya matrakte ne lwito, ne na busapudi botusapwila bantu bonso. Ino shi tusaka bantu bakapande, tufwaninwe kwibakwasha bekale bana ba bwanga ba Yesu na kwifunda nabo Bible.—1 Tm. 2:4.
2. Le i bipangujo’ka byotufwaninwe kwiipangula bitukwasha tute mutyima ku kushilula kifundwa kya Bible?
2 Ta Mutyima ku Kushilula Kifundwa kya Bible: Shi muntu wasangela musapu, lelo uloñanga bukomo bwa kuyuka mwa kwitanina nandi ne kumujokela bukidibukidi na kitungo kya kushilula kifundwa kya Bible? Le i difuku’ka dyowefudile’ko kulombola muntu mwifundilwanga Bible pomwetene nandi musunsa umbajinji? I kitatyi’ka kyowanene boba badi mu dishinda dyobe dya mapepala amba twifunde Bible? Lelo ulombolanga video Mwanda Waka Twifunde Bible? ne I Bika Biloñwanga mu Kifundwa kya Bible? ku bengidi nobe, bakwenu ba ku masomo, balondakani, babutule, ne bowiyukile nabo? Popāna mabuku, le uloñanga bukomo bwa kusapwila boba bayata kitabo kya kwifunda nakyo amba twifundanga na bantu Bible ku bitupu?
3. Pa kusaka tufundije senene bubine, i bika bitusakilwa?
3 Bukwashi bwa Yehova ne Yesu: Yesu pa kuleta mbila ya “kulonga bana ba bwanga,” wāshilwile na kunena’mba “endai,” mwanda wa kulombola amba tufwaninwe kwielela’ko ne kukwata’po mulangwe. Inoko, ketushilepo bu bana banshiye ino wālaile kwikala netu. (Mat. 28:19, 20) Kadi Yehova i mwitupe mushipiditu ujila, bingidilwa pamo ne bwino botusakilwa pa kufundija bantu bubine. (Zek. 4:6; 2 Ko. 4:7) Tukokeja nanshi kulomba “mutyima ne bukomo” mwakuvuijija uno mwingilo wa mvubu.—Fid. 2:13.
4. Mwanda waka tufwaninwe kubambila meso pa kulonga bana ba bwanga?
4 Kusapula myanda miyampe kwituletelanga nsangaji mivule. Inoko, nsangaji yetu ivudilanga’ko shi tufundija muntu bubine ne kumukwasha elunge netu mu “dishinda ditwala ku būmi.” (Mat. 7:14; 1 Tes. 2:19, 20) Kya kamweno mpata, shi tubambila meso pa kulonga bana ba bwanga, tusangajanga Yehova, ke-muntu “kasakilepo muntu koneka, aa, ino usaka bonso bafikile pa kwisāsa.”—2 Pe. 3:9.