Kwiteakanya—Lufungulo lwa Kujokela’mo Kulupula Bipa
1. Lelo mwingilo wa Bene Kidishitu babajinji wasambakene namani?
1 Yesu Kidishitu wāteakenye bandi bana ba bwanga bekale basapudi ba bwino ba “myanda-miyampe ya bobwa bulopwe.” (Mat. 4:23; 9:35) Wēbafundije bino byonso enka mu Paleshitina. Inoko, kumeso kwa Yesu kukanda mūlu, wānene amba mwingilo wa Bwine Kidishitu ukasambakananga konsokonso pano pa ntanda amba “mizo yonso ya bantu nabo ke bāna-babwanga.”—Mat. 28:19, 20.
2. Kukōkela musoñanya wa Yesu wa ‘kulonga bana ba bwanga’ kulomba bika ne bika?
2 Uno mwingilo wādi ulomba kujokela ku bantu basangela myanda miyampe ya Bulopwe bwa Leza ne kwibafundija balaminine bintu byonso byāsoñenye Kidishitu. Pa kusaka amba kujokela’mo kwetu kulupule bipa, tunenwe kwiteakanya biyampe.
3. I muswelo’ka obwanya kushiya kujokela’mo kupya mu kwimona kubajinji?
3 Badikila Kutandika Bintu: Basapudi bamo baloñanga bukomo bwa kushiya kipangujo pa kwimona dibajinji na muntu ne kumulaya kwiya kwisambila’po dikwabo. Bamonanga amba kutela myanda idi mu kitabo Bifundija Bible mu kujokela’mo kupya ko kwebakweshe banze kifundwa kya Bible.
4. Mwanda ketufwaninwepo kukungila manimelo makwabo, ebiya ketukajokela muntu?
4 Byotudi na mapepala abidi a kupāna kweji ne kweji, kekishintululapo amba tukakunga kutambula a kweji wiya, ebiya ketujokela bantu. Tukokeja padi kulangula ndyoko ya bantu na kwisambila pa mwanda udi mu dipepala dyadi nadyo kala.
5. Mwanda waka i biyampe kwikala na kitungo mu ñeni?
5 Ikala na Kitungo: Kumeso kwa kujokela muntu, witūdile’ko minite mityetye ya kupituluka mu byowasonekele mwa kuyukila kyosaka kukalonga. Kimfwa, wisambile pa mwanda umo udi mu dibuku dyowamushidile kala. Nansha mushile dikwabo didi’mo mwanda mubajinji omwesambile. Shi wamushidile kipangujo, kitungo kyobe pano i kukalondolola’kyo. Pokoma kisonekwa kishintulula kishina kya mwanda, longa buninge bwa kutangididila’kyo mu Bible.
6. I kitungo’ka kyotusaka potulonga kujokela’mo kupya?
6 Kyotusaka Kinekine: Bine, kitungo kyotusaka i kushilula kifundwa kya Bible. Mu kujokela’mo kupya, tutu umo wānene muntu befunde Bible, ino nandi wapela. Tutu wajokela’ko monka na mapepala a panopano amba: “Tubaiya kulondolola kipangujo kya mu Bible kivudile kwipangula bantu ano mafuku.” Muntu pa kupwa kunena’po, tutu watanga kisonekwa ne musango ukwatañene nakyo udi mu dibuku dyotwendejanga’mo bifundwa bya Bible. Ne kino kyebafikija ku kwifunda Bible kitatyi ne kitatyi.
7. Lelo kwiteakanya senene kuketukwasha namani tushilule kifundwa kya Bible?
7 Kwitūdila’ko kitatyi kya kwiteakanya mwanda wa kukajokela’mo dipya kulombanga kwielela’ko. Nsangaji yetu ivulanga ne tukekala na dyese dya kukwasha muntu udi “mu ngikadilo mifwaninwe” kutana dishinda dya būmi.—Bil. 13:48.