Tukwashei Boba Badi mu Ngikadilo Miyampe
1. I bāni babungila Yehova kwadi mu ano mafuku?
1 Muntu ne muntu udi na malango mu mutyima wandi wa kyelekejo. (Mat. 12:35) Bible wisambila ne pa muntu wa “mutyima wandi [ulwa] divita.” (Mit. 55:21) Bamo nabo na mutyima “wa bukalabale.” (Nk. 29:22) Ino kudi kadi ne boba ‘badi mu ngikadilo ya kukamona būmi bwa nyeke.’ (Bil. 13:48) Mu ano mafuku, Yehova ubungilanga kwadi bantu badi na uno mutyima muyampe. (Hak. 2:7) Le tukokeja kwibakwasha namani bekale ke batōtyi ba Yehova?
2. I bika bitalwa na kuvuija mwingilo wetu wa kulonga bana ba bwanga?
2 Jokela’ko na Mutyima Umo: Kwikala na mumweno moloke pa kulonga kujokela’mo kupya kyo kintu kya kamweno pa kusaka kuvuija mwingilo wetu wa kulonga bana ba bwanga. (Mat. 28:19, 20) Le tudi na kampeja-bukidi ka kulonda kusangela konso kotutana? Lelo tujokelanga kukatala yense waitabije dibuku ne kusepelela myanda miyampe? Le tuloñanga bukomo bwa kwibakwasha batame ku mushipiditu? Būmi bwetu byobutalwa na uno mwanda, tufwaninwe kwikala na mutyima wa kutamija kusangela konso kotutana.
3. Le i bika byotukalonga shi tubapu kwisamba na muntu mu mwingilo?
3 Ponka pakidi mīsambo yomwesamba na muntu wasangela musapu mu ñeni po ponka pa kusoneka dijina dyandi ne adelese yandi. Lemba mwanda omwesamba, kisonekwa kyomwatanga ne mabuku owamushila. Kupwa, witungile kitungo kya kwitola kumutala panopano ponka.
4. I muswelo’ka otukalonga kujokela’mo kufike’po?
4 Longa Kujokela’mo Kupya: Polonga kujokela’mo kupya, i biyampe wikale na kyanga kadi muntu wa bulunda, kadi lombola amba binebine umutele musapwilwa mutyima. Pēleja mīsambo yenu, ikale mimanine pa Bisonekwa. Teakanya mwisambo wa mu Bible usangaja omukesambila’po, kadi ku mfulo kwa bupempudi bobe, lupula kipangujo kyosa kukalondolola pokāya dikwabo. I biyampe kwepuka myanda ya kwikokanya pa mimweno yambulwa mu Bisonekwa idi na musapwilwa. Longa buninge bwa kunenena pa bintu byomwitabije banwe bonso.—Kol. 4:6.
5. Le i bukomo’ka bwalongele pania umo, ne i bipa’ka byalupukile’ko?
5 Kujokela’mo kupya kulomba bukomo, ino mpalo idi’mo i isangaja mpata. Pania umo mu Jampani wetungile kitungo kya kulonga kujokela’mo kuvule kweji ne kweji. Washilwile na kusoneka bonso baadi witana nabo mu mwingilo wa ku njibo ne njibo, ne mu bula bwa mafuku asamba-abidi, wakebapempula dikwabo. Wadi uteakanya kubwipi byonso byakesamba ne kadi wadi wingila mwingilo wandi na kikulupiji kyonso mu musapu waadi usapula. Mu bupempudi bwandi bumo, wabwenye kushilula kifundwa na muntu wanene amba: “Mpelanga nyeke bantu kwiya kumpempula. Ino uno o musunsa wami umbajinji kuteja.” Kininga kya buswe bwa pania kyalupwile bipa biyampe. Ku mfulo kwa kweji watūdile bifundwa bya Bible dikumi.
6. Mwanda waka tufwaninwe kūminina mu kulonga kujokela’mo kupya?
6 Ngikadilo ya bantu ishintashintanga kyaba kyonso. (1 Kod. 7:31) Divule bilomba kutompa misunsa kampanda pa kusokola muntu usangela musapu ku njibo. Ino shi tujokele’mo na mutyima umo, bine, tukakwasha boba badi mu ngikadilo miyampe amba nabo batwele mu dishinda dyenda ku būmi bwa nyeke.—Mat. 7:13, 14.