Fundija Bobe Bana Bekale Bengidi
1. Le Mitōto 148:12, 13, ukankamika bambutwile Bene Kidishitu balonge bika?
1 Yehova wita bankasampe bamutendele. (Mit. 148:12, 13) Nanshi, bambutwile Bene Kidishitu baloñanga bivule, ke enkapo kufundija babo bana bubinebine bwa mu Bible ne bijila bya Leza bya mu mwikadilo kete. Bebafundijanga kadi bekale bengidi ba myanda miyampe. I muswelo’ka omukalonga kino bityebitye?
2. Le kimfwa kiyampe kya mbutwile kibwanya kwikala na lupusa’ka pa bandi bana?
2 Kimfwa Kiyampe: Mutyibi Ngideoni wālombwele bantu bandi 300 amba: “Ntalei bidi.” (Bat. 7:17) Divule Bana batalanga ne kwiula bambutwile babo. Shabana umo wingilanga bufuku, pa kyaba kya kulāla kitatyi kyajokanga ku njibo Dya Mposo lubanga, aye’ko wendanga na bandi bana mu busapudi nansha shi i mukōke bininge. Kwampikwa kunena kintu, wibafundijanga bamone amba busapudi i mwingilo wa kubadikija kumeso. (Mat. 6:33) Le bobe bana nabo bakumonanga wingila na nsangaji mingilo palapala ya butōtyi, kimfwa milombelo, kutanga Bible, malondololo, ne kusapula? Na bubine, kukekalapo kimfwa kibwaninine. Ino bobe bana bakata mpata mutyima ku bukomo bolonga bwa kwibafundija batōte Yehova shi bamona moingidila na kininga.—Kup. 6:6, 7; Loma 2:21, 22.
3. Le bambutwile bakakwasha babo bana betungile bitungo’ka bityebitye bya ku mushipiditu ne kufikila’po?
3 Bitungo Bityebitye: Bambutwile bafundijanga babo bana kwampikwa kukōka, lwendo, kunena, kuvwala, ne bikwabokwabo. Bana pa kwenda batama, bebatūdila’ko bitungo bikwabo. Shi bambutwile i Bene Kidishitu, bakakwasha babo bana betungile bitungo bya ku mushipiditu kadi bafikile’po kukwatañana na myaka ne bwino bwabo. (1 Kod. 9:26) Le ufundijanga bobe bana balondolole mu bishima bya abo bene ne kuteakanya bipindi byabo ku Masomo a Mwingilo wa Kiteokratike? (Mit. 35:18) Le wibafundijanga bepāne mu miswelo palapala ya busapudi? Le wibakwashanga betungile bitungo bya kubatyijibwa ne kwingila mwingilo wa kitatyi kyonso? Le wibakwashanga bapwane ne basapudi ba myanda miyampe ba nsangaji ne bapyasakane ba kwibakankamika?—Nk. 13:20.
4. Le bana bamwenanga’mo namani shi badi na bambutwile bashilula kwibafundija mwingilo tamba bakidi banuke?
4 Mulembi wa mitōto wānene amba: “Abe Leza, wanombwele ñeni ne ku bwanuke bwami; kadi ne kutūla ku dyalelo dino’di nasapwile mīngilo yobe ya kutendelwa.” (Mit. 71:17) Shilula kufundija bobe bana tamba bakidi banuke bekale bengidi. Kyalwilo kya ku mushipiditu kyokebakwasha bekale nakyo, kikekala na mvubu kobadi pa bukulu!—Nk. 22:6.