Fundijai Benu Bana Batendele Yehova
1. Lelo bana babwanya bine kutendela Yehova?
1 Mitōto 148:12, 13 ikankamika balumyana ne bakajana “batendele dijina dya Yehova.” Bisonekwa bidi na bimfwa bivule bya bana bātendele Leza. Kimfwa, “Samwele waingila ku meso a Yehova, aye nkasampe.” (1 Sam. 2:18) Kwādi “nsongwakaji” umo wānene mukaja Nemani amba mupolofeto wa Yehova mu Isalela ukokeja kundapa Nemani makopo. (2 Bal. 5:1-3) Pātwelele Yesu mu tempelo ne kulonga’mo bilongwa bikatakata, “banuke” bo baāsamine mu bya kanwa ke banena’mba: “Hosana! ku Mwana Davida.” (Mat. 21:15) Lelo bambutwile bakokeja namani kufundija babo bana batendele Yehova?
2. Mwanda waka i kya mvubu bambutwile bape babo bana kimfwa kiyampe?
2 Kimfwa: Kumeso kwa kukomeneja bubinebine mu mityima ya bana, bashabantu Bene Isalela bānenwe bidi kusanswa Yehova ne kulama misoñanya yandi mu mityima yabo. (Kup. 6:5-9) Shi utembaula mwingilo ne kwiutūla mu mpangiko yobe ya yenga ne yenga, benu bana nabo bakamona’mba uno mwingilo i wa mvubu kadi usangaja.
3. Lelo kaka umo wāmwenine namani mu kimfwa kya bandi bambutwile?
3 Kaka umo uvuluka na nsangaji amba: “Ponadi ñenda ntama, kisaka kyetu kyadi kitūdile nyeke busapudi mu mpangiko ya mu yenga ne yenga. Namwene amba bine bambutwile betu basenswe busapudi. Mu kutama netu twadi tumona busapudi bu kintu kisangaja.” Uno kaka wāikele ke musapudi wakubulwa kubatyijibwa na myaka isamba-ibidi ne panenwa pano kadi na kintu kya myaka 32 mu mwingilo wa kitatyi kyonso.
4. Le kwiija bana mwingilo kulomba bika ne bika?
4 Kwibeija Nyeke Mingilo: Ingilai pamo ne benu bana mu busapudi. Babwanya padi nabo kukokola ku kibelo, kutambika mwisambi netu trakte, nansha kutanga kisonekwa. Kulonga namino kukavudija nsangaji yabo ne kwibakwasha bamwene’mo busendwe bwa kusapula musapu wa Bulopwe. Pobenda batama, ne kutambila mu busapudi kwabo nako kukenda kwibweja’ko. Nanshi, mwibakwashei bendelele kumeso ne kuta mutyima ku bitungo bya ku mushipiditu.
5. Lelo i bika bisakibwa pa kusaka mwana ekale musapudi wampikwa kubatyijibwa?
5 Shi ubamone amba bana babwanya pano kwikala basapudi bampikwa kubatyijibwa ne shi abo bene badi na mutyima wa kwikala’bo, nankyo peja kulombola bakulumpe. Kwikala basapudi kukebavuluja amba nabo badi na kiselwa kya kutendela Yehova. Vuluka nyeke amba mwana pa kusaka kubatyijibwa, kalombwangapo enka ekale bidi na buyuki pamo na bwa bantu batame babatyijibwe kala. Lelo mwanobe uyukile bufundi bwa Bible bwa kyalwilo? Lelo ulondanga misoñanya ya mwikadilo idi mu Bible? Lelo usakanga kutambila mu busapudi ne kuyukana bu Kamoni wa Yehova? Shi i amo, nankyo bakulumpe bakabandaula shi mwana wafwaninwa kwikala musapudi wakubulwa kubatyijibwa.—Tala dibuku Balongololwe Mwa Kulongela Kiswa-Mutyima kya Yehova, p. 79-82.
6. Mwanda waka i kya mvubu mpata bambutwile kwiija babo bana mingilo?
6 Kufundija bana batendele Yehova ne mutyima wabo onso i mwingilo mukata. Inoko, buno bukomo butyetye bulongwa buletelanga bambutwile nsangaji pa kumona bana bendelela ku mushipiditu. Ne kya mvubu kutabuka, busangajanga Yehova pa kumona bana basapula mingilo yandi ya kutendelwa.