Bambutwile—Fundijai Benu Bana Mwingilo Wa Busapudi
1 Bipwilo byetu bidi na nsangaji, mwanda umbukata mwa boba babundile’byo mudi bana bavule badi na kyaka kya kwingidila Leza na mutyima umo. (Mus. 12:1) Mwanda nabo babadilwa mu boba betyilwe lwito lwa kutendela Yehova. (Mit. 148:12-14) Kadi bufundiji bupāna bambutwile ku babo bana difuku ne difuku bufwaninwe kwibateakanya ku kulombola lwitabijo lwabo ku bantu bakwabo mu busapudi.—Kup. 6:6, 7.
2 Tufundijei Betu Bana Bityebitye: Bana bafwaninwe kufundijibwa tamba mu bwanukenukē bwabo kukatwala bambutwile babo mu mwingilo. Tuteakanyei betu bana, bayuke kwingila uno mwingilo na bupyasakane kumeso kwa kutambila’bo mu busapudi. Tubadikilei kwibalombola patōka byobya byotusaka bakalonge ku njibo ne njibo. Bana banukenukē bakokeja kupāna matrakte nansha tupapye twa lwito ne kwita bantu bāye batanwe ku Njibo ya Bulopwe. Shi bana bankasampe i bayuke kutanga senene, tukokeja kwibanena bekale kwitutangila Bisonekwa. Bakokeja kupāna mapepala na kwialombola ku bantu kete. Pobenda bebidila, twibafundijei kwingidija Bible mu kupāna kwabo kwa mapepala. Bankasampe bavule kebadi kala na bantu bobashilanga mapepala kitatyi ne kitatyi kadi baloñanga ne kujokelamo kupya. I kipite buya mwana ekale kutambila umbusapudi pamo na mutame kutabuka’ko na nkasampe mukwabo mwine Kidishitu. Mutame ukokeja kushintulwila mwisambi nandi amba mwana ukifundijibwa mwingilo.
3 Mwana mwana-mukaji umo mwanuke walombele bakulumpe bamukwashe abwanye bisakibwa bya kwikala musapudi wa Bulopwe. Wadi ukidi na myaka itano kete mu kyakyo kitatyi, kadi kadipo uyukile kutanga, ino wadi upāna senene musapu wa Bulopwe ku bibelo. Wadi mukwate byaba bitanwa’po mavese a Bisonekwa, omwanda wadi upūtula Bible pa bino byaba, wapa’po mwisambi nandi katange, ebiya aye kaleta’po nshintulwilo.
4 Kimfwa kya bambutwile kifwaninwe kufundija babo bana mvubu ya kwikala belongolole mwanda wa kutambila mu mwingilo kitatyi ne kitatyi. I kiyampe bekale kwitūdila’ko mpangiko milumbuluke ya kusapula kitatyi kyonso ne kadi bekale kwiilēmeka, namino bana bakayuka bitatyi bitungilwe kutambila mu busapudi umbula bwa yenga.
5 Shi bana bekale bafundijibwe kusanswa mwingilo ne kutambila’mo tamba ku bwanuke bwabo, nankyo bakekala na mutyima wa kwabila madyese makatampe mu mafuku akāya kumeso, kekubulwe padi bakengila ne mwingilo wa bupania. (1 Kod. 15:58) Tufwaninwe batwe bonso kukankamika bana botudi nabo pa kipwilo bekale kwendelela kumeso senene mwanda wa ntumbo ya Yehova.