Ikalai ne “Mutyima wa Lusalusa”
1. I kika kinenenwa’mba bantu basakilwa bininge bukwashi dyalelo?
1 Kashā mu mānga, kekwaikele bantu bavule namino basakilwa bininge kukwashibwa na lusa. Kudi koneka kwa ngikadilo ya ntanda kulupukile ku milangwe izambalele ya kubulwa kusokola nsangaji, njia ne kubulwa kikulupiji. Midiyo ne midiyo ya bantu basakilwa bukwashi, ino batwe Bene Kidishitu tudi na muswelo wa kulombola amba tutele bakwetu mutyima bya binebine. (Mat. 22:39; Ngat. 6:10) Le tukalombola kuno kwibata mutyima namani?
2. Le i muswelo’ka muyampe otukalombola lusa?
2 Mwingilo Ulombola Lusa: I kutupu kukwabo kotukatana busengi bwa bine ne bwa endaenda, poso’nka kudi Leza. (2 Kod. 1:3, 4) Yehova witusoñanya tumwiule na kwikala na “mutyima wa lusalusa,” kadi i mwitupe mwingilo wa kusapwila bakwetu myanda miyampe ya Bulopwe. (1 Pet. 3:8) Kuputumina mu uno mwingilo o muswelo muyampe otukasenga “ba mityima mityumuke,” mwanda Bulopwe bwa Leza lo lukulupilo lwa bine ku bantu basusuka. (Is. 61:1) Yehova byadi na lusa pa bantu bandi, panopano ponka usa kufundula’ko bibi ne kutūla’ko ntanda mipya myoloke.—2 Pet. 3:13.
3. I muswelo’ka otubwanya kumona bantu na mwādi mwibamwena Yesu?
3 Mona Bantu na Mwādi Mwibamwena Yesu: Nansha ke kitatyi kyādi kisapwila Yesu bibumbo bya bantu, kādipo wibamona bonso mu kikonge. Wādi umona bisakibwa bya ku mushipiditu bya umo ne umo. Bādi pamo bwa mikōko yampikwa mukumbi wa kwibendeja. Mutyima wa Yesu wātengelwe na byaāmwene, ne kino kyāmutonwene ebafundije na mutyima mutūke. (Mako 6:34) Kumona bantu mwādi mwibamwena Yesu kuketukankamika tulombole bantu umo ne umo lusa lwa binebine. Kino kikamwekela ku muswelo otunena ne mumwekelo wa mpala. Tukatangidija busapudi kumeso, ne kukwatañanya binenwa byetu mwanda wa kuvuija bisakibwa bya umo ne umo.—1 Kod. 9:19-23.
4. Mwanda waka tufwaninwe kuvwala lusalusa?
4 Kibumbo kikatampe kya bantu batambile mu mizo yonso betabanga biyampe ku musapu wa Bulopwe ne ku muswelo muyampe wibatebwa mutyima. Shi twendelele kuvwala lusalusa, tukalēmeka ne kusangaja Yehova, Leza wetu wa lusa.—Kol. 3:12.