Le Bobe Bana ke Belongolole?

1. Mwanda waka bana bakidi ku masomo basakilwa kwilongolola?

¹ Kitatyi kibafwena kya kushilula mwaka mukwabo wa masomo. Na bubine, bobe bana bakatana bikoleja bikwabo ne kuningilwa. Kadi bakekala na mikenga mipya ya ‘kusapula bya binebine.’ (Yoa. 18:37) Le ke belongolole kala?

2. Le bobe bana bafwaninwe bidi kuyuka bika, pa kwikala belongolole?

² Le bobe bana ibemvwanije senene bintu bibadilwa mu bisela bya kufwila ntanda, mafetyi a bajentaila ne mwanda waka kwikuja’mo i kubi? Le ke belongolole kala ku kuningilwa kobakaningilwa amba balondelonde masomo malamala, kwinangila na mulangwe wa kwisonga, ne kutoma malwa nansha bitomibwa bikolwañana? Lelo bakanena’tu amba bilongwa byampikwa kufwaninwa ibipelejibwe mu kyabo kipwilo’ni nansha bayukile muswelo wa kushintulula nkulupilo yabo?—1 Pet. 3:15.

3. Le bambutwile bakokeja kulonga bwabo Butōtyi bwa Kisaka bwa kyolwa namani pa kuteakanya babo bana?

³ Longa Butōtyi bwa Kisaka bwa Kyolwa: Bine, ukasakilwa padi kwisamba na bana mu bula bwa mwaka wa masomo shi kubamweka bisakibwa. Bukomo bukatampe bolonga bwa kwisambila pa myanda yobakokeja kutana ku masomo kumeso kwa abo kushilula, bukapa bobe bana kikulupiji. Le ubulwe’po kulonga musunsa umo nansha mivule butōtyi bwa Kisaka mwanda wa kwisambila pa uno mwanda? Ukokeja kwipangula bobe bana bintu bibalengejanga bazumbije mutyima pobakimba kukajokela ku masomo. Myanda yomwesambile’po myaka ishele kunyuma, ikokeja kubandaulwa monka pano patama bana ne pobaikala na kwivwanija kuvule. (Mit. 119:95) Ubwanya kutweja’mo bipindi bya kwiibidija mokekala bu mwadimu, mudingidi, nansha bu mwanā masomo mukwabo. Mfundija bobe bana mwa kulondolwela kukwatañana na Bible, ne mwa kwingidijija bingidilwa pamo bwa mabuku Comment raisonner ne Les jeunes s’interrogent. Mbutwile umo waingidije bipindi bya kwiibidija pa kuteakanya bandi bana bafwene badimu babo bapya, ku ñanjilo’tu kwa mwaka ne mwaka wa masomo ne kwibasapwila’mba i Batumoni ba Yehova.—Tala Kiteba kya Mulami kya Falanse kya 15 Kweji 12, 2010, paje 3-5.

4. Le i bika bikalonga bambutwile batunangu?

⁴ Bikoleja bikokeja kutana bankasampe Bene Kidishitu mu ano mafuku a ku mfulo byendanga ‘bikomena’ko.’ (2 Tem. 3:1, Bisonekwa Bitokele) Bambutwile batunangu bakalangulukila’po kumeso kwa kitatyi. (Nk. 22:3) Longa bukomo bwa kukwasha bobe bana belongolole kumeso kwa kushilula mwaka wa masomo mupya.