Le Kodi Mwiteakanye mwa Kushilwila Masomo?

1. Lelo i mikenga’ka imutengele pomusa kushilula masomo?

¹ Banwe bankasampe Bene Kidishitu pomwiandikija ku masomo mwaka mubajinji nansha shi mufundanga kala mutanwanga na makambakano ne mitabakano. Inoko kwikalanga mikenga ya ‘kusapula bubinebine.’ (Yoa. 18:37) Lelo kodi kala mwiteakanye mwa kusapwila bukamoni?

2. Lelo i mu miswelo’ka modi mwilongolole mwa kushilwila masomo?

² Pa kusaka’mba unekenye mu miswelo yonso ya būmi bobe, kodi mufundijibwe bivule na Yehova, na bambutwile bobe, ne na Umpika wa binebine, udi na manwa. (Nk. 1:8; 6:20; 23:23-25; Ef. 6:1-4; 2 Tem. 3:16, 17) Ne kutatana kwine mpika, pano uyukile i makambakano’ka akutengele ku masomo. Byodi na bufundiji bwa Leza ne kuyuka kifuko kyoenda’mo, witeakanye mwa kusapwila bukamoni. (Nk. 22:3) Ta mutyima ku bufundiji ne madingi a kamweno a mu Bisonekwa adi mu mabuku abidi Les jeunes s’interrogent ne mu bishinte bitala bankasampe bilupulwanga kitatyi kyonso mu Réveillez-vous !

3. I miswelo’ka ikokeja kukukwasha kusapula bukamoni?

³ Mwaba obe wa pa bula ukakukwasha usapule bukamoni mu miswelo mivule. Kitatyi kimona bantu bakwabo muvwadilo ne mwidyangwilo obe mulumbuluke, mwiendelejo ne muneneno obe, bulēme bolēmekele bakwenu ku masomo ne badimu, nansha ke ba lwenu lukongo bene, ne kumona’mba udi na kyalwilo kiyampe mu būmi, padi bamo bakakwipangula’mba, “Mwanda waka wi mwishile na bakwenu?” (Mal. 3:18; Yoa. 15:19) Padi kino kikakushitwila mukenga wa kusapula bukamoni ne kulombola nkulupilo yobe. (1 Tem. 2:9, 10) Umbula bwa mwaka, ukokeja padi kutanwa na bikoleja bilomba kutwela mu bisela bya ntanda nansha mafetyi. Shi abakwipangula mwanda waka upela kulonga’byo, lelo ukanena’tu bitupu amba, “Kipwilo kyetu kipelejanga’byo; ami ndi Kamoni wa Yehova,” nansha ukatwelela pa uno mukenga na kusapula myanda ya Shobe wa buswe, Yehova? Na bukwashi bwa Yehova, kwiteakanya kuyampe kukakukwasha wikale mwilongolole mwa kupānina bukamoni buyampe ku badimu, bakwenu ba ku masomo, ne ku bantu bakwabo.​—1 Pet. 3:15.

4. Mwanda waka ufwaninwe kukulupila amba ubwanya kukomena bikoleja bya ku masomo mu mwaka onso mutuntulu?

⁴ Nansha shi ubatuyuka pa kwenda ku masomo, ino vuluka amba udi na bavule bakusenswe, bakusakila kufunda biyampe mu mwaka onso mutuntulu. Pakwabo napo, tuloelelwe pamo nenu na kukulupila’mba kemukabulwe’po kusapwila bakwenu mu uno mwaba wenu wa pa bula. Nanshi, kankamanai ne kwiteakanya mwa kwendela ku masomo!