Kokekaka
1. Bilomba kwikala na bukankamane pa kulonga bika, ne mwanda waka?
1 Lelo kodi mwikake kusapula ku masomo mwanda wa moyo wa kutyina kufutululwa? Na bubine bilomba bukankamane pa kwisamba na diwi ditunduke, nakampata shi udi na bumvu. Le i bika bikakukwasha?
2. Mwanda waka i biyampe kwikala na bujinguludi kitatyi kyotusapula ku masomo?
2 Ikala na Bujinguludi: Nansha byokokeja kumona masomo bu obe mwaba, vuluka’mba kukatengelapo kushilula misambo ya ku mushipiditu na muntu ye-yense na mokokeja kusapwila ku njibo ne njibo. Ikala na bujinguludi bwa kuyuka kitatyi kya kwisamba. (Mus. 3:1, 7) Mwanda wisambilwa’po ku masomo nansha madevwala bikokeja kukupa mukenga wa kulombola lwitabijo lobe. Nansha omufundanga nandi, ukokeja kukwipangula kine kyokulongelangapo mingilo imoimo. Bene Kidishitu bamo balombwele badimu babo kungalwilo’tu kwa mwaka wa masomo amba i Batumoni ba Yehova ne kwibapa mabuku ashintulula nkulupilo yetu. Bakwabo bashiyanga mabuku pa abo meza mwanda wa kukolomona bipangujo bya bobafunda nabo.
3. I muswelo’ka obwanya kwiteakanya mwa kusapwila ku masomo?
3 Witeakanye: Shi witeakanya kikulupiji kyobe kikatama. (1 Pet. 3:15) O mwanda longa bukomo bwa kulanga bipangujo byobabwanya kwipangula, ne kulangulukila pa muswelo obwanya kulondolola. (Nk. 15:28) Shi bibwanika, enda na Bible obe ne mabuku matyetye, kimfwa dibuku Comment raisonner, Les jeunes s’interrogent, ne mabuku esambila pa bupangi ku masomo, mwanda wa kunyemena’ko ponso pobilomba kunyemena’ko. Nena bambutwile batweje ino myanda mu butōtyi bwenu bwa kisaka.
4. Mwanda waka ufwaninwe kwendelela na kusapula ku masomo?
4 Ikala na Mumweno Muyampe: Kokalanga amba bomufundanga nabo bakakufutulula nyeke kitatyi kyonena bubinebine. Bamo bakakusangela pa mwanda wa bukankamane bobe ne babwanya’nka ne kukwivwana. Ino kokatyumukwa mutyima shi kekudipo witabije musapu. Yehova ukasangela bukomo bolonga. (Bah. 13:15, 16) Endelela kumulomba akukwashe ‘wisambe nyeke kwa kubulwa moyo.’ (Bil 4:29; 2 Tem. 1:7, 8) Fwatakanya’po nsangaji yokekala nayo kitatyi kikuteja muntu. Uno muntu ubwanya kufula ku kwikala mwingidi wa Yehova pamo bwa abe!