Bankasampe—Mwenai Byabuyabuya Mu Masomo Omufunda
1 Lelo wiivwananga namani shi konje wa bushipo wapu, kemusake kufungula masomo? Wikalanga na kipyupyu kya kukimba byabuyabuya mu mwaka mukwabo wa masomo? Lelo usa kukakwatakanya mikenga yokamona ku masomo ya kusapula bubinebine ku balunda nobe ba ku masomo ne ku bobe badimu? Tukulupile’mba usakanga kulonga bintu bivule ku masomo.
2 Ikala Mwifundi Muyampe: Kitatyi kyodi mu kalasa, wikale kwiteakanya senene ne kuteja na katentekeji, nankyo ukamwena’mo byabuyabuya bikakukwasha mu mafuku mavule. Ikala na kampeja-bukidi ka kulongela madevwala obe, ino kokialeka avutakanye mingilo yobe ya Kiteokratike.—Fid. 1:10.
3 Shilula mwaka mupya wa masomo na kutanga mukanda Mashahidi wa Yehova na Elimu. Kupwa, abe nansha bobe bambutwile, mufwaninwe kupa badimu bobe uno mukanda umo umo. Mwibayukijei’mba kipangujo kyo-kyonso kyobakepangula kikalondololwa. Kino kikebakwasha bevwanije senene misoñanya ne nkulupilo yobe ne kwingidila nobe pamo ponso poingidija myanda yofundile. Kadi kino kikapa badimu bobe kikulupiji amba abe ne bobe bambutwile musakile kwingidila nabo pamo kitatyi kyobakufundija bufundiji bwa mvubu.
4 Ikala Kamoni Muyampe: Ubulwe’po kumona masomo bu mwaba obe wa busapudi bwa kiponka na ponka? Mu bula bwa mwaka wa masomo wiya’mo, ukamona mikenga mivule ya pa bula ya kupāna bukamoni. Yuka’mba udi na buyuki bwa kumushipiditu bwakutendelwa, shi ulombole’bo bakwabo ‘ukepandija abe mwine, ne bakukwivwana bēne kumo.’ (1 Tem. 4:16) Wivwane ulame mwiendelejo wa bwine Kidishitu mulumbuluke ne kusapula bukamoni ponso pomona mukenga wa kwibupāna, ukamwena’mo byabuyabuya abe mwine ne bantu bakwabo.
5 Tutu umo nkasampe wāpene bukamoni bwa kiponka na ponka ku balunda nandi ba ku masomo. Mu boba baitabije wandi musapu, mwādi mwine Katolika umo, muntu wakubulwa kwitabija’mba Leza udi’ko nandi umo, wadi na kibidiji kya kufutulula boba bakulupile mudi Leza, ne nkasampe umo ntomya-mfwanka, ntondwe wa mu meso fututu. Uno tutu nkasampe ke mukwashe bantu 15 mu balunda nandi, pano i bepāne kudi Leza kadi babatyijibwe.
6 Shi ke pano, banwe bankasampe, putuminai mu kufunda masomo ne mu kupāna bukamoni mu mwaba wenu wa pa bula. Nabya mukamwena byabuyabuya bivule mu masomo enu omufunda.