Mwenai Kamweno Mu Masomo Enu’nka Ne Pa Mfulo
1 Kitatyi pano kibabwana kitompolanga bankasampe bavule amba: “Eyo! Masomo kadi abetwiila!” Kufungulwa kwa masomo divule kuletanga bikoleja bifwaninwe kunekenya ne kutuyuka, ino kadi kwiyanga na byabuyabuya bivule ku bankasampe bekankila kumwena kamweno mu myaka yabo ya masomo.
2 Byalwilo biyampe bya ku masomo bikwashanga ku kwendelela kwa kumushipiditu. Bintu bilonga muntu mutame bimanine nakampata pa byobya byaālongele mu bunkasampe bwandi. Mo monka mobikadile ne mu myanda itala masomo, “kyonka kikunine muntu, shi kika, shi kika, kyo kyonka kyākāngula.” (Ngat. 6:7) Bankasampe bepēne mu kufunda bakokeja kwikala na manwa akebekadija ke bantu bakengidijibwa na Yehova mpata.
3 Kifwaninwe kubandaula bintu bya kumeso shi tusaka kulonga butongi buyampe mu myanda itala masomo. Bambutwile bafwaninwe kukwasha babo bana mu kutonga masomo abwanya kwibaletela bufundiji bufwaninwe bukebapa muswelo wa kufikila pa bitungo bya kumushipiditu. Bankasampe batamija manwa abo bakekala bantu bayukile kwisāsaketa abo bene, koku bengila bu bapania. Byalwilo bya ku masomo bifwaninwe kwibakwasha batendele Yehova konso kobamwingidila.
4 Bankasampe, mwenai kamweno kakatampe mu myaka yenu ya masomo, na kwitungila kitungo kya būmi buvudilwe mwingilo ukola, kupita’ko kwikala mpeta mu kaji ka ino ntanda. Mwikankilei kwingidija būmi bwenu mu kulonga kiswamutyima kya Yehova. Uno o muswelo omukokeja kolola mashinda enu, mwanda wa kutumbija Yehova.—Mit. 1:3.