Masomo ne bitungo byobe bya kumushipiditu
1 Kufunda masomo maluji mu bunkasa kukakupa manwa mayampe a kuyuka kutanga ne kulemba biyampe, ukekala na buyuki kampanda mu bwifundi bwa umbuo wa ntanda, bwa mānga, bwa kupikula ne bwa sianse. Kadi ukokeja kuyuka ne muswelo wa kulanga biyampe, kubandaula ne kupwa myanda kampanda, ne kutamija bwino bwa kupunga bintu. Buno bufundiji bukakukwasha mu būmi bobe bonso. Ino masomo akokeja kwioba namani na bitungo bya kumushipiditu byowitungile umbūmi ne kukupa “ñeni mituntulu ne kulangalanga”?—Nk. 3:21, 22.
2 Ikala wa kamweno mu mwingilo wa Leza: Poenda ku masomo, tá mutyima ku byomufunda, longa madevwala obe biyampe shē. Wivwane uyuke kutanga ne kwifunda biyampe, ukabandaula Kinenwa kya Leza bipēla byonka, ukekala nyeke mukomo kumushipiditu. (Bil. 17:11) Buyuki buvule bokekala nabo bukakupa muswelo wa kwisamba na bantu ba ngikadilo, masakila, ne nkulupilo mishileshile boketana nabo mu busapudi. Bufundiji botambula ku masomo bukekala na kamweno mu kuvuija biselwa byobe bya bwine Kidishitu mu bulongolodi bwa Leza.—Enzankanya na 2 Temote 2:21; 4:11.
3 Yuka kwisasaketa: Shi uninge, ukokeja kufunda manwa akakupa pa kumwena kadyeya shi ubapwija masomo. (Enzankanya na 1 Temote 5:8.) Tonga senene masomo a kulonda. Kokepeneneka na kulonda masomo opwa ino watunya kusokola kaji, tompa kwifunda myanda ya bupunga nansha busendwe kampanda bukusokweja kaji kayampe. (Nk. 22:29) Masomo a uno muswelo akakupa dishinda dya kwisasaketa abe mwine nansha shi kotongele kukengidila kuntu kudi kusakibwa kukatampe.—Enzankanya na Bilongwa 18:1-4.
4 Kwikala muyuke bufundiji kampanda ku masomo kukakukwasha utandabule mwingilo obe. Wielele’ko mwa kuboila manwa a kwisasaketa koku wendelela na mwingilo wa Yehova. Bine, masomo akakukwasha ufikile pa bitungo byobe bya kumushipiditu.