Miswelo Isatu ya Mwa Kulumbulwila Kufundija Kobe
1. I kika kine kyotufwaninwe kulumbulwila kufundija kwetu?
1 Basapudi bonso Bene Kidishitu i bafundiji. Kitatyi kyotupempula muntu musunsa mubajinji, kyotumujokela mwanda wa kutamija kusepelela, nansha kyotwendeja kifundwa kya Bible, tupānanga musapu. Kadi musapu otusapula ke wa bitupu bitupupo. Tushintululanga mu muswelo upēla “bisonekwa bikola” bikokeja kupa bantu “ñeni ya ku lupandilo.” (2 Tem. 3:15) Bine dino i dyese’po kashā! Tutalei miswelo isatu ya mwa kulumbulwila kufundija kobe.
2. Tukokeja kufundija namani mu muswelo upēla
2 Kunena Bipēla: Shi tuyukile mutwe wetu wa mwanda biyampe, kikokeja kwikala kipēla kwilwa amba yewa keuyukile senene ukokeja kumukomena kwimvwana. Nanshi shi twendeja kifundwa kya Bible, ke biyampepo kuvudija bya kunenanena bya bitupubitupu. I biyampe kulombola myanda mikatampe idimo. Kebilombepo kunena bivule pa kufundija biyampe. (Nk. 10:19) Divule dine kutanga bisonekwa biselele myanda mikatampe kudi na mvubu. Kupwa kutanga kisonekwa, komeneja pene po kikwatañene na mwanda mwine o mwifunda. Mu Busapudi bwandi bwa ku Lūlu budi mu Mateo 5 ku 7, mutanwa bubinebine bwa mushike, ne Yesu wasapwile’bo mu binenwa bityetye kadi mu bishima bipēla kwivwana.
3. Le byelekejo bidi na kamweno’ka ne i bya muswelo’ka bikalanga biyampe?
3 Byelekejo: Byelekejo bilangulujanga, bilangulanga malango ne kukwasha pa kuvuluja. Kokalanga’mba pa kuleta byelekejo biyampe, bilomba wikale muyuke kwana ñano. Yesu wādi uleta byelekejo bipēla kadi bīpi. (Mat. 7:3-5; 18:2-4) Kifwatulo kifwatule pa papye nakyo kibwanya kukwasha. Shi wi mwilongolole senene, nabya ukengidija byelekejo biyampe.
4. I muswelo’ka muyampe otukengidija bipangujo?
4 Bipangujo: Bipangujo bilengejanga mwifundi nobe alanguluke. Nanshi ikala na kitūkijetyima shi ubaipangula kipangujo. Shi abe mwine ulondolole bukidi, nankyo kukayukapo shi mwifundi i mwivwanije senene. Shi byalondolola ke abyopo, i biyampe kumuludika na tubipangujo twa ntentekelo atane kilondololwa, pa kyaba kya kumupelela’byo. (Mat. 17:24-27) Shako kemudipo mufundiji mubwaninine motudi. Inoko Bible witukankamika tute mutyima mpata ku mufundijijo wetu. Shi tulonge namino tukamona byabuyabuya bya nyeke ne boba betwivwana bene.—1 Tem. 4:16.