Fundija mu Muswelo Upēla
1. Lelo mufundijijo mulumbuluke uyukilwanga kuka?
1 Kupēleja myanda ko kuyukilwanga’po mufundijijo mulumbuluke. Kubandaula muswelo wādi ufundija Mufundiji Mukatampe, Yesu, kuketukwasha tulumbulule “bwino bwetu bwa kufundija.”—2 Tem. 4:2, NW; Yoa. 13:13.
2. Lelo i bika bilomba pa kufundija mu muswelo upēla, ne kufundija uno muswelo kuletanga bipa’ka?
2 Wisambe mu Muswelo Upēla: Busapudi bwa ku Lūlu budi na bubinebine bwa mushike kebwanenenwe na muntu nansha umo, ino bwāsapwilwe mu muswelo upēla. (Mat., shap. 5 ku 7) Bibumbo byādi biteja Yesu byādi “ke bitendela kufundija kwandi.” Bamudyavita bātuminwe kukamukwata bāfudile ku kunena’mba: “Kasha kekwaikelepo unena pamo bwa uno muntu!” (Mat. 7:28, 29; Yoa. 7:46) Kebitulombepo kwingidija binenwa bya katutu, misemwa mikutakane, nansha kusasaula bimfwa kamo ne kamo mwanda wa kunekenya bantu. Bubine bukokeja kushintululwa senene na kunena motunenenanga.
3. Mwanda waka bamo balundikilanga bemvwaniki babo myanda mivule, ne tukepuka namani kulonga namino?
3 Yuka Buvule bwa bya Kunena: Yesu wādi uta bemvwaniki mutyima na kuyuka buvule bwa myanda ya kwibasapwila musunsa ne musunsa. (Yoa. 16:12) Pa uno mwanda tufwaninwe kwikala na bujinguludi ne kuyuka kukwatañanya, nakampata potusapwila babutule, bantu bashilula kusangela musapu, nansha bana. Tufwaninwe kutadija kutyina’mba twakebalundikila bivule nansha shi bamweka bu betwivwene na katentekeji. Boba badi na mutyima moloke bakendelela kutambula buyuki bwa Yehova, Leza wa bine.—Yoa. 17:3; 1 Kod. 3:6.
4. Mwanda waka i kya mvubu kwimanina pa myanda mikatampe pa kyaba kya kushotolola kamo ne kamo?
4 Imanina pa Myanda Mikatampe: Yesu kādipo ulēmejalēmeja bufundiji bwandi na kubweja’mo myanda mivule. Pānene amba “Bonso badi mu bibundu . . . bakatambemo,” ke kyādipo kitatyi kya aye kushintulula bibumbo bibidi bya bakasangulwa. (Yoa. 5:28, 29) Potwendeja bifundwa bya Bible, tufwaninwe kwimanina pa myanda mikatampe ne kwepuka mutyima wa kubwejabweja myanda yampikwa mvubu keidipo mu byotwisamba.
5. Le i dyese’ka dyotukamona shi tufundija mu muswelo upēla?
5 Bine i kya nsangaji mikatampe pa kuyuka’mba Yehova witufundijanga mu muswelo upēla byonso byotufwaninwe kuyuka! (Mat. 11:25) Nanshi twiibidijei kufundija mu muswelo upēla amba tumone nsangaji ya mwingilo ulupula bipa.