Tulupeto Tubidi twa Bulēme Butyetye

Muswelo wa mvubu otukwatakanya nao tumweno twa Bulopwe i wa kupāna lupeto lwa kukwasha mu mwingilo wa busapudi wingilwa ntanda yonso. Le shi twi balanda le?

Difuku dimo Yesu wāmwene mulanda mukaja mufu ulambula mu kibīko kya ku tempelo tulupeto tubidi bwa bulēme butyetye. Buswe bwaswele Yehova bo bwāmutonwene apāne aye “wampikwa’byo . . . tonso twādi nato, ne kakupandila kakola.” (Mako 12:41-44) Yesu wāmumwene ne kunena amba byalambula’bya bidi na mvubu mikatampe kudi Leza. Mo monka ne Bene Kidishitu ba mu myaka katwa kabajinji kebādipo bamona kiselwa kya kupāna byabuntu mwanda wa kukwatakanya mwingilo bu dyese didi enka ne Bene Kidishitu bampeta. Mutumibwa wātelele kimfwa kya Bene Masedonya, nansha ke byobādi mu “bulanda bwabo bukatampe . . . [bāikele] kwitusenga pakatampe’mba: Mutambule buno buntu.”—2 Kod. 8:1-4.

O mwanda, shi tudi na muswelo wa kupāna enka ‘tulupeto tubidi twa bulēme butyetye,’ tuvulukei amba shi tutyange tutyetutye’twa tusa kwikala ke kibalwa kikatampe. Kupāna kotupāna na mutyima umo kukasangaja Tata wetu wa buntu, ke-muntu aye i “Leza uswele wakupana ne mutyima, tō.”—2 Kod. 9:7.