Muswelo Okokeja Kumwena mu Kisumpi Kyenu kya Busapudi
1. Le i byabuyabuya’ka byadi bimwenwa mu Kifundwa kya Kitabo kya pa Kipwilo bikidi’ko ne dyalelo kupityila ku kisumpi kyetu kya busapudi?
1 Lelo kudi miswelo imo ya Kifundwa kya Kitabo kya Kipwilo yowabudilwe? Bisumpi byadi bityetye kadi bifuko bivule mupitwa luvula senene. Kino kyadi kilengeja tutandabule bulunda, bwine bwetukweshe twikale bakomo ku mushipiditu. (Nk. 18:24) Mutadi wa kifundwa kya kitabo wadi na mukenga wa kuyuka ngikadilo ya umo ne umo ne kwibakankamika. (Nk. 27:23; 1 Pet. 5:2, 3) Bino byabuyabuya bikidi’ko ne dyalelo kupityila ku kisumpi kyetu kya busapudi.
2. Le i muswelo’ka otukalwila’ko kutandabula bulunda mu kisumpi kyetu kya busapudi, bwine buketukwasha twikale bakomo ku mushipiditu?
2 Alwila’ko: Divule dine bisumpi bya busapudi bidi na bukata bumo bonka na bwadi na bisumpi bya kifundwa kya kitabo. Kitatyi kyotusapula “mu bumo” na bakwetu, tuningijanga kipwano kyetu. (Fid. 1:27, Dibuku Dijila) Lelo i bantu banga bokodi musapule nabo mu kyenu kisumpi? Le ubulwe’po ‘kwibaija’ mu uno mwanda? (2 Kod. 6:13) Pakwabo kadi, tubwanya kyaba kimo kwita muntu wa mu kyetu kisumpi āye atanwe netu mu bwetu Butōtyi bwa Kisaka bwa kyolwa nansha kudīla netu pamo. Mu bipwilo bimo, bisumpi bya busapudi i biabile mayenga a kutundaila muneni mupempudi. Shi ke yenga wa kisumpi kampanda, kisumpi’kya kibuñanga mwanda wa kudila pamo ne kwikankamika, ekale nansha shi muneni kakatanwa’kopo.
3. Le i mikenga’ka imo-imo yotubwanya kutambwila’mo bupempudi bwa bukumbi mu kisumpi kyetu kya busapudi?
3 Dyalelo nansha kipwilo byo ke kibuñanga misunsa ibidi kete mu yenga, kino kekishintululapo amba basapudi kebakibwanyapo kutambula bupempudi bwa bukumbi. Batadi ba bisumpi ibatūlwe mu kisumpi ne kisumpi mwanda wa kukankamika muntu ne muntu ne kumufundija mwingilo wa busapudi. Shi mutadi wa kyenu kisumpi kasapwīle nobe kashā, le wabulwapo kumulomba mukasapule nandi? Kadi, mutadi wa mingilo usapulanga na bisumpi bishileshile mu dya Mposo ne dya Yenga dimo kweji ne kweji. Mu bipwilo bityetye mudi’tu bisumpi bya busapudi bibala-binga, mutadi wa mingilo ukelongolola mwanda wa kupempula kisumpi ne kisumpi misunsa ibidi pa mwaka. Lelo wimujadike kala mpangiko yobe mwanda wa kukasapula kitatyi kyakapempula kyenu kisumpi?
4. (a) Le kupwila kwa kwenda mu busapudi kuteakanibwanga namani? (b) Mwanda waka i biyampe tupāne njibo yetu mwanda wakulongela’mo kupwila kwa kwenda mu busapudi?
4 Divule dine kidi na mvubu kisumpi ne kisumpi kībunge mwanda wa kukasapula ku mfulo kwa yenga. Kwikala na bifuko bivule byakwitanina’ko mwanda wa kukasapula kadi bishilula pa nsaa imo yonka, kukapelejeja basapudi batanwe ku kupwila kwa kwenda mu busapudi nansha padi bende mu mwaba pampikwa kwija. Basapudi bafwaninwe kwabanibwa ne kutumwa mu mwaba pampikwa kwija. Kadi kino kikalengeja mutadi wa kisumpi ate mutyima mpata ku bantu ba mu kyandi kisumpi. Inoko, ngikadilo ikokeja kulengeja amba bisumpi bibidi nansha bivule bibungile pamo. Shi kipwilo kyonso kitaninanga pamo mwanda wa kwenda mu busapudi mu Dya Mposo dibajinji dya kweji nansha pa kupwa kwa kifundwa kya Kiteba kya Mulami, i kyendele’mo kisumpi ne kisumpi kishikatyile pamo kadi mutadi wa kisumpi apebwe maminite matyetye mwanda wa kwaba ba mu kyandi kisumpi kumeso kwa kufudija kupwila kwa kwenda mu busapudi na milombelo.—Tala kapango “Lelo Ubwanya Kupāna Njibo Yobe?”
5. Nansha mpangiko ya Kifundwa kya Kitabo kya pa Kipwilo byokeikidi’kopo, le i bika byotufwaninwe kukulupila?
5 Nansha mpangiko ya Kifundwa kya Kitabo kya pa Kipwilo byokeikidi’kopo, ino Yehova wendelelanga nyeke kwitupa byonso byotusakilwa mwanda wa kulonga kiswa-mutyima kyandi. (Bah. 13:20, 21) Na bukwashi bwa Yehova, ketubulwangapo kintu nansha kimo. (Mit. 23:1) Twimwenanga madyese mavule kupityila ku kisumpi kyetu kya busapudi. Shi twalwile’ko ‘kukusa nkunwa mingimingi’ nabya ‘tukāngulanga yonka mingimingi.’—2 Kod. 9:6.
[Kapango pa paje 6]
Lelo Ubwanya Kupāna Njibo Yobe?
Bipwilo bimo bibungilanga bisumpi bivule pamo mwanda wa kukasapula ku mfulo kwa yenga pangala pa kusakana kwa mobo a kwibungila’mo. Kupwila kwa kwenda mu busapudi byokubadilwa mu mpangiko ya pa kipwilo, o mwanda kulongela’ko mu yetu njibo i dyese dikatampe. Le wabulwa’po kupāna yobe njibo? Koketyepelwa kupāna yobe njibo amba mwanda ke ya katutupo. Bakulumpe bakabandaula kifuko kidi’po njibo yobe ne myanda mikwabo iifwene na yoya yabandawilwe kitatyi kyobadi batonga bifuko bya kulongela’ko kifundwa kya kitabo. Shi usaka kupāna yobe njibo, lombola mutadi wa kyenu kisumpi.