Kokaleka—Lwa na Milangwe ya Kubulwa Kyaba
1. Mwanda waka bamo bekakanga kushilula kifundwa kya Bible?
1 Bamo bekakanga kushilula kifundwa kya Bible amba mwanda badi na bivule bya kulonga. Kwendeja kifundwa kya Bible bine kulomba kitatyi. Kitatyi kya kwikiteakanya, kya kwendeja’kyo, ne kya kukwasha mwifundi alwe na bijika. Mutumibwa Polo wānene amba wādi upāna ne mutyima wandi mwine mu kukwasha Bene Tesalonika bayuke Yehova. (1 Tes. 2:7, 8) Le tukokeja namani kwendeja bifundwa bya Bible nansha shi tudi na bivule bya kulonga?
2. Le buswe botuswele Yehova bwitutonona twingidije kitatyi kyetu namani?
2 Kutōta Yehova Kulomba Kitatyi: Mwanda udi’po i wa kuyuka’mba kutōta Yehova kulomba kitatyi. Kimfwa, twitūdilanga’ko kitatyi kya kukapwila, kukasapula, kutanga Bible, ne kulombela. Yewa musonge nansha musongwe ukakimba kitatyi kya kusangala na mwinē pandi. Nanshi bitulomba bine ‘kukūla’ kitatyi kya kutōta Yehova mwanda tumusenswe. (Ef. 5:15-17; 1 Yoa. 5:3) Yesu wānene amba mwingilo wa kulonga bana ba bwanga i kipindi kya mvubu mpata mu butōtyi bwetu. (Mat. 28:19, 20) Kulangulukila pa uno mwanda kuketukwasha tuleke kwepa kino kiselwa kya kwendeja bifundwa bya Bible.
3. I muswelo’ka otubwanya kwikala na bifundwa nansha shi ngikadilo i mityinye kitatyi kyetu kya kusapula?
3 Ino bikekala namani shi kitatyi kyetu i kityinibwe na twaji, misongo ya bukile-bukya, nansha na biselwa bikwabo bya mu kipwilo? Kya kimo bilombanga basapudi bamo bekale kwendeja bifundwa kupityila ku telefone nansha ku Entelenete. Boba bakolejibwe na misongo ya bukile-bukya bakwatanga’ko mpangiko amba bobefunda nabo bāye kwinjibo. Bamobamo balombanga musapudi mukwabo ebakwashe ne kwendeja bifundwa byabo shi abo bene abakolelwa.
4. Le kwendeja bifundwa bya Bible kuletanga madyese’ka?
4 Polo wēmwenine nsangaji ya kupāna kitatyi ne bukomo bwandi mwanda wa kukwasha bakwabo befunde bubinebine. (Bil. 20:35) Pa kutala bipa bilupukile ku mwingilo wandi mu Tesalonika, leka, mutyima wādi umutonona afwije’ko Yehova. (1 Tes. 1:2) Tukavudija nsangaji ne kuloelelwa kwetu mu mwingilo shi ketulekapo milangwe ya kubulwa kyaba itukankaje kwingila mwingilo wa kwendeja bifundwa bya Bible.