Kokapela!

1. Le i muswelo’ka ‘oketupelejangapo biyampe’ ku bantu?

¹ Ponso potutambila na bukankamane mu mwingilo wa kusapula myanda miyampe ya Bulopwe bwa Leza, ‘ketupelejangapo biyampe’ kudi boba badi mu mwaba wetu. (Nk. 3:27) Kekudipo musapu mulumbuluke wa kusapwila muzo wa muntu upityile uno wa kusapula bitatyi bilumbuluke bisa kwikala’ko mu buludiki bwa Leza. Nansha byokokeja kusapula pampikwa kakama lukulupilo lwa bulopwe bya kiponka na ponka nansha mu kupāna mabuku, ubulwe’po kwitungila kitungo kya kwendeja kifundwa kya Bible nansha kimo, shi kudipo nakyo?

2. I bika bikokeja kwitulengeja tupele kushilula kifundwa kya Bible?

² Dimodimo, kijika kikatampe kitukalakanyanga pa kwendeja kifundwa kya Bible i mumweno otumona uno mwanda. Bamo bapelanga kwendeja kifundwa kya Bible mwanda bemonanga bu kebafwaninwepo, pakwabo i mwanda wa twaji tuvule tobengila. Madingi alonda’ko akokeja kwitukwasha tuleke kupela kwingila mwingilo wa kwendeja bifundwa bya Bible.​—Mat. 28:19; Bil. 20:20.

3. Mwanda waka twi babwanye bisakibwa bya kufundija Bible?

³ Kubulwa Kwikulupila: Padi kufundilepo bininge, pakwabo kwikulupilepo amba ukokeja kwendeja kifundwa kya Bible pangala pa bubinga kampanda. Bengidi Bene Kidishitu ba mu myaka katwa kabajinji nabo bādi “bantu bitupu bampikwa ne kufunda bikatampe kwine” abo’ko bengila biyampe. Ino i bika byēbakweshe bafundije bakwabo bubinebine? I pa mwanda “badi benda ne Yesu.” (Bil. 4:13, MB) Bāfundijibwe na Yesu, Mufundiji Mukatampe, wa bufundiji ne manwa alaminwe mu Bisonekwa. Nansha shi kufundilepo masomo makata, ino ufundijibwanga bufundiji bwa ku mushipiditu bupityile bonso.​—Is. 50:4; 2 Kod. 3:5.

4. I ñeni’ka yotwaboila ku kimfwa kya Amose?

⁴ Kyaba kimo Yehova wādi utuma bapolofeto kukatopeka balopwe bādi balonga bibi nansha bantu bakwabo ba bitenta bikatampe. Bapolofeto bamo bādi balanda, kimfwa Amose. Aye mwine wānene amba: “Amiwa nkyadipo mupolofeto nansha patyetye, nansha bu-mwana mupolofeto ami mhm; ino nādi mukumbi ne mwapudi wa bipa bya bikuyu.” (Am. 7:14) Nansha nankyo, Amose kāpelelepo kulombola Amazia, kitobo mutōtyi wa bankishi, musapu wa butyibi bwa Yehova. (Am. 7:16, 17) Tufwaninwe kuvuluka nyeke amba twingilanga mwingilo wa Leza, kadi aye mwine ye witukumbanya biyampe shē mwa kwingidila mwingilo waitupa.​—2 Tem. 3:17.

5. Mwanda waka tufwaninwe kulonga buninge bwa kushilula kifundwa kya Bible nansha shi tudi na twaji tuvule?

⁵ Kuvudilwa Twaji: Nansha byodi na twaji tuvule, ino witūdile’ko kala kitatyi kya kutambila mu mwingilo kitatyi ne kitatyi. Kwendeja kifundwa kya Bible i kipindi kya mu mwingilo kileta nsangaji mpata. I dyese dikatampe kumona mwingidila Kinenwa kya Yehova mu būmi bwa muntu. (Bah. 4:12) Yehova uloelelwanga shi twielela’ko kukwasha bantu “bafike ne pa kuyūkidija kwa bubinebine.” (1 Tem. 2:4) Ne bamwikeulu nabo basangalanga pa kumona muntu ushinta mwiendelejo wandi wa kala ne kwendelela kumeso ku mushipiditu.​—Luka 15:10.

6. I dyese’ka dyotudi nadyo mu kulonga kiswa-mutyima kya Leza?

⁶ Leza “usakila bantu bonso kupanda, bafike ne pa kuyūkidija kwa binebine.” (1 Tem. 2:4) Bine, tudi na dyese dya kwingila mwingilo ukwatañene na kiswa-mutyima kya Leza ponso poketupelepo kwendeja bifundwa bya Bible!