“Fikijija Biyampe Mwingilo”
1. Le I kimfwa’ka kiyampe kyāshile mutumibwa Polo mu mwingilo?
1 “Fikijija biyampe mwingilo obe.” (2 Tem. 4:5, MB) Mutumibwa Polo wādi bine na bukankamane bwa kunena pa kudyumuna Temote. I kimweke amba, Polo wāvuile ñendo yandi ya bu mishonele mu kitatyi kya tamba mwaka 47 kutūla ku 56 K.K. Mukanda wa Bilongwa utela misunsa mivule Polo amba wādi ‘usapula’ mpata. (Bil 23:11; 28:23) Le netu tubwanya’byo namani dyalelo?
2. I muswelo’ka otubwanya kufikijija biyampe mwingilo potwenda ku njibo ne njibo?
2 Ku Njibo ne Njibo: Pa kusaka kutana bantu kebaimvwene myanda miyampe, bitulomba kulonga bukomo bwa kwibapempula mu bitatyi bishileshile mu difuku. Bana-balume bakokeja kutanwa kwinjibo ku mansaa a ku kyolwa nansha ku mfulo kwa yenga. Tulongei bukomo bwa kwisamba na bantu ku njibo ne njibo, kujokela kyaba kyonso ku mobo oketwatene’kopo bantu. Le shi ubalonga bukomo bonso ino kutupu kwibatana? Padi kwibalembela mukanda nansha kwibeta ku telefone kubwanya kukwasha.
3. Le i mikenga’ka yomudi nayo ya kusapula mu bibumbo bya bantu ne bya kiponka na ponka?
3 Mu Kibumbo kya Bantu ne Kiponka na Ponka: Bengidi ba Yehova dyalelo basapulanga “ñeni” ya bine ku bonso basaka kuteja. Kyaba kimo basapulanga “mu mikenza” ne mu “bifuko bya kibundi pebungilanga bantu.” (Nk. 1:20, 21, DD) Potwenda mu mingilo yetu ya bukile-bukya, le tuvulukanga kupāna bukamoni? Le tubwanya kunena’mba, ‘twi balēmenenwe na mwanda’? (Bil. 18:5) Shi i amo, nankyo tuvuijanga kiselwa kyetu kya ‘kufikijija biyampe mwingilo wetu.’—Bil. 10:42; 17:17; 20:20, 21, 24.
4. Lelo milombelo ne kulanguluka bitukwasha namani tufikijije biyampe bukamoni?
4 Inoko, kyaba kimo, pa mwanda wa bukōkekōke bwetu ne bumvu bwa kibutwila, tukokeja kwikaka kupāna bukamoni. Bine ne bine ponka, Yehova uyukile mikalo yetu. (Mit. 103:14) Inoko, shi bino bintu bibetukambakanya, tulombelei mwanda wa kumona bukankamane bwa kwisamba. (Bil. 4:29, 31) Kadi, potulonga kifundwa kya kasuku ne kulangulukila pa Kinenwa kya Leza, tubwanya kuningija mutyima wetu wa kufwija’ko pa buya bwine bulumbuluke bwa myanda miyampe. (Fid. 3:8) Kino kiketutonona tusapule na bupyasakane!
5. Le tubwanya kufikidija namani bupolofeto bwa Yoela?
5 Mupolofeto Yoela wālaile amba, kumeso kwa kwiya kwa difuku dikatakata dya Yehova dilenga nzuba, bantu ba Leza bakekala “benda” enka kwenda ne kuleka kintu nansha kimo mpika kibakankaje kusapula. (Yoe. 2:2, 7-9) Twielelelei’mo mu uno mwingilo wa kupāna bukamoni, mwingilo keukengilwapo dikwabo!