Ikala na Kininga mu ‘Kusapula Bukamoni ne pa Mfulo’
1, 2. Le i kika kikutulumuja pa mwādi mumwenine Polo busapudi bwa myanda miyampe, ne i muswelo’ka otukokeja kwiula kifwa kyandi kya ‘kusapula bukamoni ne pa mfulo’?
1 Mutumibwa Polo wādi musapudi mupyasakane wa myanda miyampe pamo bwa Yesu ne bwa bengidi bavule ba kikōkeji ba pa kala, o mwanda ‘wāsapwile bukamoni ne pa mfulo’ mu ngikadilo yonso. Nansha ke paādi mukutwe mu njibo ya kifungo, “wadi usepelela bonso badi batwela mwādi. Ne kusapula bya bulopwe bwa Leza, kadi ne kufundija byobya bya mwādi mwendele Mfumwetu Yesu Kidishitu na bukankamane bonka.”—Bil. 28:16-31.
2 Netu tukokeja ‘kusapula bukamoni ne pa mfulo’ na kininga kitatyi kyonso. Kino kilomba ne kusapwila bantu bonso botwitana nabo potwenda ne potujoka ku Kitango kya Distrike “Tumbijai Leza Ntumbo,” nansha potudi mu kibundi mulongelwa kitango.—Bil. 28:23; Mit. 145:10-13.
3. I muswelo’ka otukepuka kwikadija busapudi bwetu bwa kiponka na ponka ke bwa kitulumukila?
3 I Busapudi bwa Kitulumukila’ni, I bwa Kiponka na Ponka? Lelo padi kwishila? Bine kudi’po. Kintu kya mu kitulumukila kilongekanga’tu na bya dyese, pa kubulwa kukunga, kintu kyowadi kuteakenye nansha kyowadi kulangila. Ino na bubine mwingilo wetu keudipo namino’u. Monka mwādi mumwenine’kyo Polo, kutumbija Leza ntumbo na busapudi bwetu i kintu kya kamweno kotudi, kadi tufwaninwe kwikala bate mutyima ku kusapula ponso pokifwaninwe, nansha potudi mu lwendo. Inoko, muswelo otukokeja kulumba bakwetu ukokeja kutelwa monka mokyendele amba i wa kiponka na ponka—ko kunena’mba, na mutyima mutūke, na bulunda ino pampikwa kwilaya. Kulumba bantu uno muswelo kulupulanga bipa biyampe.
4. I bika byākweshe Polo asapule bukamoni ku njibo kwaādi ushikete?
4 Witeakanye Kusapula Bukamoni: Polo wādi wikadija’ko mikenga ya kusapula bukamoni paādi mu njibo ya kifungo mu Loma. Wākwete mulangwe wa kwita bendeji ba Bayuda bādi mwine’mwa ku njibo kwaādi ushikete. (Bil. 28:17) Shako mu Loma mwādi kipwilo kya bwine Kidishitu, ino Polo wāyukile amba kitango kya Bayuda bādi mu kibundi kekyādipo kijingulwile biyampe myanda itala lwitabijo lwa bwine Kidishitu. (Bil. 28:22; Loma 1:7) Penepa kēkakilepo ‘kusapula bukamoni ne pa mfulo’ butala padi Yesu Kidishitu ne Bulopwe bwa Leza.
5, 6. I mikenga’ka yotukokeja kusapula’mo busapudi bwa kiponka na ponka, ne tuketeakanya namani mwanda wa kusapula’bo mobifwaninwe?
5 Ela milangwe ku bantu bonso bokokeja kwitana nabo poenda, ino abo kuyuka biyabiya Batumoni ba Yehova mpika. Padi kebayukilepo ne kuyuka kwine amba tukimbanga kwifunda na bantu bifundwa bya ku mobo ku bitupu. Ta mutyima ku mikenga ya kusapwila boba bowitana nabo mwishinda, pomukōkolokwa pa bitūlo, pabwejibwa esanshi, pomupota bintu, pomudi ku hotela, pomudya mu leshitola, pomukanda mu myotoka, ne bitatyi bikwabokwabo. Ikala muteakanye byokokeja kunena mwanda wa kushilula mwisambo ne kusapula nansha bityetye bukamoni. Pakwabo mafuku āya kumeso ukokeja kusapwila balondakani nobe, balongo, bengidi nobe, ne bowiyukile nabo busapudi bwa kiponka na ponka.
6 Usakilwa kwikala na mabuku a kusapula nao bya kiponka na ponka. Mabuku’ka? Ukokeja kwilamija matrakte. Shi mudi na trakte Aimeriez-vous en savoir plus sur la Bible ?, nabya ukesambila pa misango itano imbajinji, padi buluji bwishileshile bufwaninwe kutangilwa Bible. Ukalombola mwa kuketela kapindi kadi kunshi kalombwanga nako kifundwa kya Bible. Shi i muntu usangela musapu, nabya mushile boloshile Kisaka Leza. Ekale ulanga kwitana na bantu besamba ludimi lweni, nabya wilamije matrakte, maboloshile ne mapepala a mu ndimi īsambwa mu mapolovenshi makwabo. Wivwane wendanga lwa motoka, ukokeja kusela mabuku abala-anga makwabo a kupa boba basangela musapu wa Bulopwe byabinebine.
7, 8. I madingi’ka otufwaninwe kulonda atala pa mumwekelo ne mwiendelejo wetu potudi mu lwendo nansha potwipwija mukose?
7 Ta Mutyima ku Mumwekelo ne Mwiendelejo Obe: Tufwaninwe kutadija mwiendelejo wetu, muvwadilo ne mwidyangwilo wetu kutyina amba bantu baketumona bibi nansha ‘kwisambila bibi’ bulongolodi bwa Yehova. (Bil. 28:22) Tukatadija potudi ku kitango, potwenda mwishinda ne potwipwija mukose. Kiteba kya Mulami kya difuku 1 Kweji 8, 2002, paje 30, musango wa 14, kyadyumwine amba: “Mumwekelo wetu keufwaninwepo kwikala wa kwimwekeja, mupambaile, ulangula bilokoloko, ulombola ngitu patōka, wa bukobakane. Kadi tufwaninwe kuvwala mu muswelo ulombola amba ‘twi bene Leza.’ Uno i mwanda ufwaninwe kulanguluka’po, mwene i amo? Ke kunena’po amba tufwaninwe kuvwala biyampe enka potwenda ku kupwila [nansha potudi ku kitango] kete, shi ke mu bitatyi bikwabo twalengwa’ko. Mumwekelo wetu ufwaninwe nyeke kwikala wa bwine Leza, wa bulēmantu, mwanda twi bene Kidishitu kyaba kyonso bufuku ne mwinya.”—1 Tem. 2:9, 10.
8 Tufwaninwe kuvwala na bumvubumvu ne na bulēmantu. Shi mumwekelo ne mwiendelejo wetu ulombola nyeke lukulupilo lwetu mudi Leza, ketukekakapo nansha dimo kusapula busapudi bwa kiponka na ponka amba mwanda’po mumwekelo wetu i mutyani.—1 Pet. 3:15.
9. Busapudi bwa Polo mu Loma bwāendekele namani?
9 Busapudi bwa Kiponka na Ponka Bupa Bipa: Myaka yonso ibidi yādi Polo mu njibo ya kifungo mu Loma, wāmwene bipa biyampe bya busapudi bwandi. Luka witusapwila amba “bamo bamo baitabija bintu by[ādi bi]sapulwa.” (Bil. 28:24) Polo mwine wāmwene mvubu idi mu ‘kusapula bukamoni ne pa mfulo’ paāsonekele amba: “Kyokya kyamfikile kyaalamukile ke kya kwendeja Myanda Miyampe kumeso. Balami bonso ba mu kipango kya mulopwe mukatampe ne bantu bakwabo bonso abayukidila’mba kyo ngikadile mu kifungo i mwanda wa Kidishitu o ñingidila. Ne banabetu betabije bavule pa kumona mo ngikadile mu kifungo, nabo abakankamanyinyina mudi Mfumwetu, abenyingisha bikata kusapula Mwanda wa Leza ne moyo mwine mpika.”—Fidipai 1:12-14, MB.
10. Lelo i bipa’ka biyampe byamwene ba mulume ne mukaji mu busapudi bushipo bwadi’mo?
10 Mwaka wadi’mo’u, ba mulume ne mukaji bamo pa kupwa kupityija difuku ku kitango kya distrike, basapwidile bya kiponka na ponka lolo umo mutēki webepangwile kine kyobavwadile tuyukeno twa kitango. Nabo bamushintulwila pa bitala kitango ne lukulupilo ludi mu Bible lwa būmi bwiya kumeso. Bamupa trakte Aimeriez-vous en savoir plus sur la Bible ? ne kumulombola mpangiko ya kwifunda kifundwa kya Bible kya ku njibo. Lolo’wa wanena amba usaka muntu wa kwiya kumupempula, wasoneka dijina dyandi ne adelese pa nyuma pa trakte, ne kulomba ba mulume ne mukaji’ba bamukimbile’ye. Lelo nobe i bipa’ka biyampe byokamwena uno mwaka mu ‘kusapula na kininga bukamoni ne pa mfulo’?
11. I ngikadilo’ka yotukatamija mwanda wa kwendeleja kumeso myanda miyampe mu buno bushipo na ‘kusapula bukamoni ne pa mfulo?’
11 Endeleja Kumeso Myanda Miyampe ne pa Mfulo: Langa’po nsangaji yādi na Polo pa kwivwana amba bene Kidishitu bakwabo beulanga kifwa kya bupyasakane bwandi! Netu tulongei bukomo bwetu bonso twendeleje kumeso myanda miyampe na kusapula kiponka na ponka nkulupilo yetu imanine pa Bible kitatyi kyotukamwena byabuyabuya ku kitango kya distrike kīya’ko.
[Kapango pa paje 3]
Mabuku Asakibwa mu Busapudi bwa Kiponka na Ponka
■ Aimeriez-vous en savoir plus sur la Bible ? (trakte)
■ I Kika Kisaka Leza Kotudi? (boloshile)
■ Matrakte a mu ndimi mikwabo
■ Mabuku etu makwabo
[Kapango pa paje 4]
Kokibelwa!
Bāni? Bonso basangela musapu batenwe ku Kivulukilo kya lufu lwa Kidishitu nansha ku dishikulu dya pa bula. Le kodi mwibete bakatanwe ku kitango kya distrike kya uno mwaka? Kepabulwe bavule shi bekale kukankamikwa na kanye bakatanwa’ko. Bine, pobakasepelela kisense kyubaka ku kitango ne pobakakankamikwa na mpangiko ya ku mushipiditu, kebakabulwepo kufwena kudi Yehova ne ku bulongolodi bwandi. Lelo wabulwa’po kwibeta ne kumona mobisa kupityila? Wibashintulwile i bika bibasakilwa kuyuka, kubadila’mo ne mafuku a kweji a kitango, kukalongelwa kitango, ne bitatyi bikashilula ne kufula bipimpo, kadi ukatana myanda ya mpangiko mu kīpi pa paje wa mfulo wa Réveillez-vous ! wa mafuku 8 Kweji 6, 2003.