Tendelai Yehova na Kusapula Kiponka na Ponka
1 Bengidi ba dikōkeji ba Yehova bakimbanga mikenga ya kumutendela difuku ne difuku. (Mit. 96:2, 3; Bah. 13:15) Muswelo umo otukokeja kulonga namino i uno: kusapula kiponka na ponka. Dyalelo, batōtyi bavule ba Yehova bafwijanga’ko mpata mwanda kudi muntu kampanda wāile kwibafikijija musapu wa Bulopwe na busapudi bwa kiponka na ponka.
2 Kusapwila muntu busapudi bwa kiponka na ponka pavule kushitwilanga bakwabo dishinda dya kwivwana musapu wa Bulopwe. Kifwa, mīsambo ya Yesu na mwana-mukaji mwine Samadia ku mushimwa wa Yakoba yāfikije bakwabo bavule ku kusangela myanda miyampe. (Yoa. 4:6-30, 39-42) Ba Polo ne Shilasa, kitatyi kyobādi bakutwe mu kifungo mu Fidipai, bāsapwidile mulami wa kifungo, ebiya kipango kyonsololo kya uno mukelenge kyāitabija bubinebine.—Bil. 16:25-34.
3 Mikenga: I mikenga’ka yodi nayo ya kusapula kiponka na ponka? Bamo basapulanga namino kitatyi kyobapota bya kupota, kyobenda mu byendwa nabyo, nansha kyobakunga muñanga. Bakwabo basapula pa kukōkolokwa ku kaji nansha ku masomo. Ne kutūla mabuku etu poamweka nako’nka kusolokejanga bakwabo mutyima wa kusaka kuyuka nkulupilo yetu.—1 Pet. 3:15.
4 Mwa Kushilwila: Kana-kakaji kamo ka bumvu ka myaka isamba-ibidi kaivwene ku kupwila banena amba kidi na mvubu mpata bantu bonso basapule. Pa kwenda kukapota bya kupota na inako, katūla maboloshile abidi mu wako sakoshi. Aye inako upota bya kupota ku kontwala, ako kakajana kapāna boloshile kudi nsongwakaji umo, nandi waitabija’ye na nsangaji. Pobaipangwile kano kanuke ka bumvu muswelo okamwene bukomo bwa kufwena yewa nsongwakaji, kalondolwele amba: “Nadi nenena’tu amba, Kubapu, Taluka, Enda! Ko kwenda naenda!”
5 Pa kusaka amba tusapule kiponka na ponka, batwe bonso tusakilwa kwikala na mushipiditu pamo bwa wa kano kanuke kana-kakaji. I kika kikokeja kwitukwasha? Lombelai mupebwe bukankamane bwa kunena. (1 Tes. 2:2) Lamai mu ñeni kipangujo nansha nshintulwilo ya mutwe wa mwanda usangaja yomukokeja kushilula nayo mīsambo. Kadi kulupilai amba Yehova ukemwesela mu bukomo bwenu bomulonga.—Luka 12:11, 12.
6 Kusapwila kiponka na ponka bantu botutana difuku ne difuku kupanga Yehova mitendelo ne nsangaji. Kukokeja kolwela muntu mu dishinda ditwala ku būmi bwa nyeke.