Twi Batumoni Kitatyi Kyonso
1. I ñeni’ka yotuboila ku nsekununi ya Yesu wāsapwidile mwana-mukaji ku mushimwa?
1 Yesu wāendele lwendo lwa mansaa mavule. Wākōkele ne kwimvwana kyumwa. Bana bandi ba bwanga pa kwenda kukapota bidibwa, aye wādi kashikete ku mushimwa panja pa kibundi kya Samadia mwanda wa kukōkolokwa. Yesu kādipo wenda kukasapula mu Samadia; aye wādi upita’tu wenda ku Ngadilea kukengila kokwa. Nansha nankyo, wāmwene mukenga wa kusapwila mwana-mukaji wāile kuteka mema. (Yoa. 4:5-14) Mwanda waka? Mwanda Yesu kālekelepo kwikala “kamoni kalumbuluke, ka binebine.” (Kus. 3:14) Twiulanga Yesu na kwikala Batumoni ba Yehova kitatyi kyonso.—1 Pet. 2:21.
2. Lelo tuketeakanya namani mwa kusapwila busapudi bwa kiponka na ponka?
2 Ikala Mwiteakanye: Tukokeja kwiteakanya mwa kusapwila kiponka na ponka na kwilamija’ko mabuku. Basapudi bavule baselanga matrakte ku makasa ne kuponejeja’o bantu bengila mu mangajini, bapoteja esanshi, ne bantu bobetana nabo mu mwingilo. (Mus. 11:6) Kaka umo wendakananga bininge wadi wilamija nyeke Bible mutyetye ne dibuku Bifundija Bible mu kasakoshi, kadi ushilulanga na boba badi nandi kubwipi.
3. Lelo i muswelo’ka otukokeja kushilula mīsambo?
3 Shilula Misambo: Potusapula bya kiponka na ponka, kebitulombepo kushiluka enka na myanda ya mu Bisonekwa. Yesu kāshilwilepo mīsambo na mwana-mukaji ku mushimwa na kwiyukanya aye mwine bu Meshiasa. Wāmulombele’tu enka mema a kutoma, walangula kusepelela kwandi. (Yoa. 4:7-9) Kaka umo wamwene amba ino ntwelelo imukwashanga ashilule mīsambo pobamwipangula shi waendele ku fetyi. Pa kyaba kya kulondolola’tu amba kaendele’kopo mwanda i Kamoni wa Yehova, aye unenanga amba, “Natongele ami mwine kuleka kwenda’ko.” Mwipangudi usaka kuyuka bivule uvudile kwipangula mwanda waka, ne kino kikwashanga kaka apāne bukamoni.
4. Mwanda waka Mateo 28:18-20 ukukunkanga ku mutyima?
4 Nansha byāpwile Yesu mwingilo wandi pano pa ntanda na bupyasakane, ne pano utele nyeke mutyima ku mwingilo wa busapudi wingilwa na mwaāngidile’o. (Mat. 28:18-20) Nanshi, pamo bwa Yesu, Kimfwa kyetu, netu twi Batumoni belongolole kusapwila bantu bonso lwitabijo lwetu kitatyi kyonso.—Bah. 10:23.