Tulumbululei Manwa Etu mu Mwingilo—Na Kushilula Mīsambo Itwala ku Busapudi bwa Kiponka na Ponka

Kyokwikadile na Mvubu: Kitatyi kyotusapula ku njibo ne njibo, divule dine bantu bavule kebekalangapo ku mobo. Inoko, tubwanya kwitana nabo mu myotoka, pobelaija dokitele ku lupitalo, mu kitatyi kya kukokolokwa ku kaji nansha ku masomo, ne ku bifuko bikwabo. Yehova usaka bantu bonso bevwane musapu wa Bulopwe. (1 Tm. 2:3, 4) Pavule pene shi tusaka kusapula, batwe bo bafwaninwe kushilula mīsambo.

Mwa Kulongela:

Tonga bya kunena. Lelo muntu umweka bu usangela bantu ne usakile kwisamba? Lelo ngikadilo yomudi’mo ilengeja mwisambe biyampe? Basapudi bamo batalanga bidi muntu na mimungomungo. Shi nandi wamungamunga, ebiya bashilula mīsambo.
Shi ubabulwe bukankamane bwa kwisamba, nabya lombela mu kīpi mundamunda.—Neh. 2:4; Bil. 4:29.
Shilula na binenwa bīpi, pamo bwa lwimu. Kitatyi Yesu kyāesambile na mwana-mukaji mwine Samadia, kāshilwilepo’tu na kwisambila pa Bulopwe. (Yoa. 4:7) Kyaba kimo mīsambo ikokeja kushilulwa na kutendela muntu, kimfwa’mba: “Bobe bana badi na ngikadila miyampe!” Muswelo mukwabo wa kushilula mīsambo i wa kwipangula kipangujo, kimfwa’mba: “Le nobe waivwene byobanene mu misapu ya kesha kyolwa?”
Shi mubashilula kwisamba, twelela’po mwanda wa kwisambila pa myanda miyampe, ino ke biyampepo kwiyumbija. Leka bidi mīsambo yendelele na banwe besamba ingi. Padi ukokeja kutela mwanda kampanda uloba muntu tudi mukanwa. Kimfwa, shi mwisambila pa myanda ya kisaka, ukokeja kunena’mba, “Ne musokole madingi mayampe a mwa kutamijija bana.” Shi mwisambila pa myanda ya panopano, ukokeja kunena amba, “Nasangedile myanda miyampe ya panopano itala kushinta yonatangile.” Kebyakakuzozeja shi mīsambo ibafule abe kusapula mpika.
Sela matrakte nansha mabuku makwabo a kupa boba basangela musapu.

Tompa Kulonga Namino uno Kweji:

Yenga ne yenga, longa bukomo bwa kushilula mīsambo nansha’tu na muntu umo na kitungo kya kusapula kiponka na ponka.