Le Wi Mwilongolole Mwa Kusapwila bya Kiponka na Ponka?
1 Busapudi bwa kiponka na ponka i buyampe mpata. Mu Bible mudi bimfwa bivule bya busapudi bwa kiponka na ponka bwālupwile bipa bilumbuluke. (Yoa. 4:7-15) Le tuketeakanya namani mwanda wa uno muswelo wa busapudi?
2 Muvwadilo ne Mwidyangwilo: Kuta mutyima kyaba kyonso ku muvwadilo ne mwidyangwilo wetu kuketupēlejeja tusapwile bakwabo lwitabijo lwetu kwampikwa kwikaka. (1 Tem. 2:9, 10) Shi tubayuka’mba mumwekelo wetu ke muyampepo, uyuka ke twikaka pa kusapula bukamoni. Ino, mumwekelo wetu wa bulēme ne dyangi ukalengeja bipangujo ku bantu. Kimfwa, ba mulume ne mukaji Batumoni badi bavwele senene mu lwendo, bashikata kubwipi na Mizilma umo. Pa kujingulula mumwekelo wabo, uno muntu webepangula shi i Bene Kidishitu. Kino kyashilula mwisambo wa masaa asatu wimanine pa Bible.
3 Kushilula Mīsambo: Yesu paētene na mwana-mukaji Mwine Samadia ku mushimwa wa Yakoba, Yesu wāshilwile mwisambo na kumulomba amupe’ko mema a kutoma. Mo monka, netu tukokeja kushilula mwisambo na kunena kamwanda kēpi nansha kwipangula kipangujo kipēla. Nansha byotukokeja kwikaka kyaba kimo, shi tukulupile mu bukwashi bwa Yehova, tukokeja ‘kukankamana ne kukankamana’ mwa kushilwila mwisambo.—1 Tes. 2:2.
4 Kimba Mikenga: Basapudi bavule basokolanga mikenga mwa kusapwila bya kiponka na ponka. Bandaula ngikadila yodi’mo, kupwa langa bantu bokokeja kwitana nabo mu difuku. Wilamije bitabo kampanda ne ka Bible katyetye. Yuka kujingulula bintu, kadi ta mutyima ku bantu bakujokolokele. Kyaba kyolanga mikenga yokokeja kutana mu dyuba, kukabulwepo kwilongolola mwa kusapwila bukamoni bulumbuluke.—Fid. 1:12-14; 1 Pet. 3:15.
5 Tudi na bubinga bubidi bwendele’mo bwa kuboya mikenga ya kusapula busapudi bwa kiponka na ponka—buswe botuswele Leza ne botuswele mukwetu. (Mat. 22:37-39) Byaikala mwingilo wa busapudi ke wa kupēlakana nao, ketwakilengwai busapudi bwa kiponka na ponka. Twilongololei ne kuboya mukenga onso amba tusapwile bantu myanda miyampe ya Bulopwe pano pakishele’ko kakitatyi.—Loma 10:13, 14; 2 Tem. 4:2.
[Bipangujo bya Kifundwa]
1. Le i bimfwa’ka bilombola’mba busapudi bwa kiponka na ponka i buyampe?
2. Le muvwadilo ne mwidyangwilo wetu ukokeja namani kukwasha twilongolole mwa kusapwila bukamoni?
3. Lelo i muswelo’ka nobe owashilwile mwisambo na kulonda kimfwa kya Yesu?
4. Le tukokeja kwilongolola namani mwanda wa busapudi bwa kiponka na ponka?
5. Mwanda waka ke biyampepo kulengwa kusapula busapudi bwa kiponka na ponka?