Iula Kimfwa kya Bapolofeto—Mika
1. Mobimwekela, i kipangujo’ka kyēipangwile Mika, ne mwanda waka busapudi bwandi kebwadipo bwa bitupubitupu?
1 ‘Lelo i kitatyi’ka kikafikanga mfulo ya ino ngikadilo mibi ya bintu?’ Bimweka’mba ne mupolofeto Mika nandi wēipangwile kipangujo pamo na kino kitatyi kyaadi usapula musapu wa butyibi bwa Yehova wa konakanya bulopwe bwa Isalela ne bwa Yuda. Nansha nabya, busapudi bwandi kebwadipo bwa bitupubitupu. Binenwa bya Yehova bitala Samadia byafikidile mu mwaka wa 740 K.K.K., Mika ukidi mumi. (Mika 1:6, 7) Mwenda myaka, Yelusalema wāonakanibwa mu mwaka wa 607 K.K.K. (Mika 3:12) Le i muswelo’ka otubwanya kwiula Mika pano potwilaija kufikidila kwa butyibi bwa Yehova mu ano etu mafuku?
2. Le i muswelo’ka otukalombola kitūkijetyima pano potwilaije difuku dya Yehova, ne mwanda waka?
2 Ikala na Kitūkijetyima: Mika wāsonekele amba: “Ami nami nkatala kudi Yehova; nkakungila Leza wa lupandilo lwami.” (Mika 7:7) Na bubine, Mika kadipo’tu utengele koku wikwete makasa mu kyadi amba mfulo isa kwiya shayo. Inoko, wādi wingila mwingilo wa bu mupolofeto wa Yehova. Netu pano potutengele difuku dya Yehova, tufwaninwe kwipāna mu “bilongwa bijila bya mwikadilo ne mingilo ya bwine Leza.” (2 Pe. 3:11, 12) Kitūkijetyima kya Yehova i kishile bantu kyaba kya kwisāsa. (2 Pe. 3:9) Nanshi, tulamei ku mutyima madingi a Leza a kwiula bapolofeto na kwikala na kitūkijetyima.—Yak. 5:10.
3. Mwanda waka tufwaninwe kulomba Yehova etupe mushipiditu wandi ujila?
3 Kulupila Bukomo bwa Yehova: Nansha byāpelwe Mika mwingilo mukomo, ino wādi ulomba bukomo bwa Yehova pa kwiuvuija. (Mika 3:8) Kino kyo kine kitukankamikila Kinenwa kya Yehova kukulupila mu bukomo bwa Leza. Aye upānanga bukomo ku boba badi na mpungiji mwa kuvuijija biselwa byabo bya bwine-leza. (Ñim. 84:5, 7; Isa. 40: 28-31) Lelo nobe kodi mwimwene kino mu būmi bobe poingila mwingilo ukola? Le udi na kibidiji kya kulomba Yehova akukwashe na mushipiditu wandi ujila wa bukomokomo?—Luka 11:13.
4. Le Mika i mwitushile kimfwa’ka kiyampe dyalelo?
4 Mika, wādi utangidije kiswa-mutyima kya Leza pa kifuko kibajinji mu būmi bwandi. Wādi usumininwe kwikala nyeke na lwitabijo nansha byaādi ujokolokelwe na bantu ba mwikadila mubi. Netu mo monka, bululame bwetu butompibwanga difuku ne difuku. Nanshi, tukomejei mutyima wetu wa ‘kunangila mu dijina dya Yehova Leza wetu nyeke ne nyeke-ke.’—Mika 4:5.