Le I Muswelo’ka Otukokeja Kwikala Nyeke Na ‘Mutyima Wa Kukungila’?

‘Nkalombola mutyima wa kukungila.’​—MIKA 7:7.

USA KULONDOLOLA NAMANI?

Le i ñeni’ka yotubwanya kuboila ku kimfwa kya Mika?

Lelo tutengele kumona bintu’ka?

Le tubwanya kulombola kufwija’ko pangala pa kitūkijetyima kya Yehova mu miswelo’ka imo?

1. Mwanda waka tubwanya padi kubulwa kitūkijetyima?

KITATYI kyāshimikilwe Bulopwe bwa Meshiasa mu 1914, ntanda ya Satana yātwelele mu mafuku ayo a mfulo. Mfulo mfulō Yesu pa kulwa divita momwa mūlu, waela Dyabola ne bademona bandi kufulakufula kwa pano pa ntanda. (Tanga Kusokwelwa 12:7-9.) Satana uyukile amba udi’tu na “kakitatyi katyutyu.” (Kus. 12:12) Inoko, kano kakitatyi ke kalonge makumi a myaka kadi bamo babwanya kulanga amba mafuku a mfulo abaije kitatyi kilampe. Le tukabulwa kitūkijetyima pano potwilaija Yehova alonge’po kintu?

2. Le kino kishinte kisa kwisambila pa bika?

² Kubulwa kitūkijetyima kukokeja kuleta kyaka, mwanda kubwanya kwitulengeja twiendeje bibi. Le i muswelo’ka otukokeja kwikala nyeke na mutyima wa kukungila? Kino kishinte kisa kwitukwasha twikale na mutyima wa kukungila na kulondolola ku bino bipangujo. (1) Le i ñeni’ka yotubwanya kuboila ku kimfwa kya kitūkijetyima kyētushidile mupolofeto Mika? (2) Le i bintu’ka bikalombola mfulo ya kitatyi kyotukungile? (3) Le i muswelo’ka otukalombola kufwija’ko pangala pa kitūkijetyima kya Yehova?

LE I ÑENI’KA YOTUBWANYA KUBOILA KU KIMFWA KYA MIKA?

3. Le Isalela wādi mu ngikadilo’ka mu mafuku a Mika?

³ Tanga Mika 7:2-6. Mika mupolofeto wa Yehova wāmwene ngikadilo ya ku mushipiditu ya bulanda yādi’mo Isalela kufika ne pēbabikadile Ahaza Mulopwe mubi. Mika udingakanya bene Isalela bampikwa kikōkeji na “pimbye” ne na “lusao lwa miba.” Pamo bwa pimbye ne miba bituñanga muntu shi webityampa, bano bene Isalela bantomboki bādi basanshija bakwabo. Buno butomboki bwelundile’ko bininge kufika’nka ne ku kuketa kipwano mu bisaka. Mika pa kuyuka amba kabwanyapo kushinta kintu nansha kimo aye mwine, wāpungulwidile mutyima wandi kudi Yehova. Kupwa wākungila na kitūkijetyima Leza alonge’po kintu. Mika wādi ukulupile amba Yehova ukalonga’po kintu pa kitatyi kyasaka Aye mwine.

4. Le i bikoleja’ka byotutanwanga nabyo?

⁴ Pamo bwa Mika, tudi mu bukata mwa bantu bakwisakila. Bavule i “[bampikwa kufwija’ko], ne bampikwa bu-ujila, ne bampikwa lusa lwa bu-butule.” (2 Tem. 3:2, 3) Tufitwanga bininge kitatyi kilombola bantu botwingila nabo, botufunda nabo ne balondakani mushipiditu wa kwisakila. Inoko, bengidi ba Leza bamo badi’nka ne na bikoleja bikatampe. Yesu wānene amba balondi bandi bakapangwapangwa na bisaka, kadi wāingidija bishima biifwene na bidi mu Mika 7:6 mwanda wa kulombola lupusa lwādi lwa kwikala na musapu wandi. Yesu wānene amba: “Naiya’mba, bāshamuntu ne mwanandi bakatūpakana, ne bamwana ne inamuntu nabo monka, kadi mwana ne inandi-muko nabo monka; ebiya muntu ukashikibwa’nka na ba mu njibo yabo.” (Mat. 10:35, 36) Bine, i bikomo kūminina kupangwapangwa kwa bantu ba mu kisaka kebadipo na nkulupilo yetu! Shi tubatanwa na ano matompo, ketwakanekenibwai na kuningilwa na kisaka. Ino, twikalei nyeke na kikōkeji ne kukungila Yehova na kitūkijetyima apwije myanda. Shi tumulomba kitatyi ne kitatyi etukwashe, uketupa bukomo ne tunangu totusakilwa pa kūminina.

5, 6. Le Yehova wāesele Mika muswelo’ka, ino le Mika kēmweninepo bika?

⁵ Yehova wāesele Mika mwanda wa kitūkijetyima kyandi. Mika wēmwenine mfulo ya Mulopwe Ahaza ne buludiki bwandi bubi. Wāmwene Hezekia Mulopwe muyampe mwana Ahaza upyana lupona ne kwaluja mutōtelo utōka. Kadi musapu wa butyibi wāsapwile Yehova kupityila kudi Mika pa Samadia, wāfikidile kitatyi kyātambilwe bulopwe bwa Isalela bwa kungala.​—Mika 1:6.

⁶ Inoko, Mika kēmweninepo kufikidila kwa byonso byāmulombwele Yehova kufumika ku bukomo bwa mushipiditu. Kimfwa, Mika wāsonekele amba: “Mu mafuku a kumfulo’a . . . , lūlu lwa njibo ya Yehova lukakomejibwa mu nsongo ya ngulu, kadi lukazunzulwa pangala pa tungulu; ino bantu bakafula ponka pa alo. Ebiyampe mizo mingimingi ikenda ke inena’mba: Iyai tukande ku lūlu lwa Yehova.” (Mika 4:1, 2) Mika wāfwile kumeso’tu kwa buno bupolofeto kufikidila. Nansha nabya, wādi musumininwe kwikala nyeke na kikōkeji kudi Yehova kutūla’nka ne ku lufu, nansha shi bantu bādi bamujokolokele bālongele namani. Mika wāsonekele pa uno mwanda amba: “Bantu bonsololo bakananga, enselele mu dijina dya leza wandi, enselele mu dijina dya leza wandi, kabidi batwe netu tukananga mu dijina dya Yehova Leza wetu nyeke ne nyeke-ke.” (Mika 4:5) Mika wādi ukungile na kitūkijetyima mu bitatyi bya bulanda, mwanda wādi ukulupile bya binebine amba Yehova ukafikidija milao Yandi yonso. Mupolofeto wa kikōkeji wādi ukulupile mudi Yehova.

7, 8. (a) Mwanda waka tudi na bubinga bwa kukulupidila? (b) Le i bika bikalengeja kitatyi kyende lubilo?

⁷ Lelo tudi na lukulupilo lwa uno muswelo mudi Yehova? Tudi na bubinga buyampe bwa kukulupidila. Mwanda twimwenanga batwe bene kufikidila kwa bupolofeto bwa Mika. Mu “mafuku a kumfulo,” midiyo ya bantu ba mizo yonso ne bisaka ne ndimi batūtyikilanga ku “lūlu lwa njibo ya Yehova.” Nansha byobatambile ku mizo idi mu lwana, bano batōtyi ‘bafudile bipete byabo ke nkasu,’ ne kupela “kulombola bulwi monka.” (Mika 4:3) Bine, tudi na dyese dya kubadilwa mu bantu ba Yehova ba ndoe!

⁸ Na bubine, tusakanga Yehova afudije ino ngikadilo mibi panopano ponka. Inoko, shi tusaka kukungila na kitūkijetyima, tufwaninwe kumona myanda na mwiimwena Yehova. I mutūle’ko difuku dyakatyibila muzo wa muntu mambo kupityila kudi Yesu Kidishitu, “muntu wātongele.” (Bil. 17:31) Ino kumeso kwa buno butyibi, Yehova upanga bantu bonso mukenga wa kwikala na “kuyūkidija kwa binebine,” wa kwingidija’ko, ne wa kupanda. Būmi pano budi mu kyaka. (Tanga 1 Temote 2:3, 4.) Shi tuputumine mu kukwasha bakwetu batambule buyuki bwa binebine bwa padi Leza, kitatyi kishele’ko kumeso kwa butyibi bwa Yehova kufika kikenda lubilo. Panopano ponka​—nansha mu kitulumukila—​kitatyi kisa kufika. Shi kibafika, tusa kwikala bine na nsangaji mwanda wa kuputumina nyeke mu mwingilo wa kusapula Bulopwe!

LE I BINTU’KA BILOMBOLA MFULO YA KITATYI KYOTUKUNGILE?

9-11. Le 1 Tesalonika 5:3 wāfikidile? Shintulula.

⁹ Tanga 1 Tesalonika 5:1-3. Panopano ponka, mizo ikanena’mba “ke talala, nyā, yonka ndoe.” Shi tusaka tuleke kongolwa na bino binenwa, tusakilwa ‘kutala ne kwikala senene.’ (1 Tes. 5:6) Pa kusaka tushale nyeke balanguke ku mushipiditu, tubandaulei bidi mu kīpi bintu bya mvubu bidi mu luno lubila lwa kamweno.

¹⁰ Pa kupwa kwa mavita onso abidi a ntanda, mizo yāelele lubila lwa ndoe. Divita dibajinji dya ntanda pa kupwa, kwābundwa Kitango kya Mizo na lukulupilo lwa kuleta ndoe. Mwenda mafuku pa kupwa kwa divita dya bubidi dya ntanda yonso, bantu bakulupila’mba Bumo bwa Mizo bukaleta ndoe pano pa ntanda. Umbikalo ne bendeji ba bipwilo bāsamba na bino bitango kipwano mwanda wa bantu bekale mu ndoe. Kimfwa Bumo bwa Mizo bwāsapwile amba, mwaka wa 1986 i Mwaka wa Ndoe ya Ntanda yonso. Mu uno mwaka, bendeji ba mizo mivule ne bipwilo belungile kudi mukulumpe wa Kipwilo kya Katolika mu Assise mu Itadi, mwanda wa kulombela milombelo ya kuleta ndoe.

¹¹ Inoko, luno lubila lwa ndoe ne mutyima-ntenke nansha mbila mikwabokwabo pamo bwa luno, keyāikelepo bu kufikidila kwa bupolofeto busonekelwe mu 1 Tesalonika 5:3. Mwanda waka? Mwanda ‘konakanibwa bukidibukidi’ kwālailwe kwādi kekwafikile.

12. Le i bika byotuyukile pa binenwa bya amba “ke talala, nyā, yonka ndoe”?

¹² Lelo i ani ukanena bino binenwa bya amba “ke talala, nyā, yonka ndoe”? Le bendeji ba kine Kidishitu ne ba bipwilo bikwabo bakengila mwingilo’ka? Le bendeji ba maludiki palapala bakela nabo luno lubila? Bisonekwa kebinene’popo kintu. Kintu kyotuyukile i kino amba, nansha shi bino binenwa bikale bya namani nansha shi bikanekenye bantu namani, bikekala bya bitupu. Ino ntanda minunu ikaludikwa’nka na Satana. Ikekala nyeke mibole kadi keikashintapo. Bine kikekala kya bulanda shi muntu yense mubukata mwetu waitabija bongojani bwa Satana ne kujilula kubulwa kwikuja mu myanda ya ntanda kwetu kwa bwine Kidishitu!

13. Mwanda waka bamwikeulu bakwete luvula lwa bonakani?

¹³ Tanga kusokwelwa 7:1-4. Pano potutengele kufikidila kwa 1 Tesalonika 5:3, bamwikeulu babukomo bakwete luvula lwa bonakani lwa kyamalwa kibūke. Le belaije bika? Kintu kimo kikatampe kyālombwelwe na mutumibwa Yoano​—kutulwa kiyukeno kwa mfulo kwa “bapika ba Leza wetu”a bashingwe māni. Abo’tu pa kupwa kutulwa kino kiyukeno kya mfulo, bamwikeulu bakalekelela luvula lwa bonakani. Le i bika bikalongeka?

14. Le i bika bilombola amba mfulo ya Babiloni Mukatakata ke idi pabwipi?

¹⁴ Babiloni Mukatakata umbikalo wa ntanda wa mutōtelo wa bubela, ukafula. “Bantu, ne bibumbo, ne mizo, ne ndimi” kebakabwanyapo kwiukwatakanya. Tumonanga kala bilomboji bilombola amba mfulo yao idi pabwipi. (Kus. 16:12; 17:15-18; 18:7, 8, 21) Na bubine, kubulwa kukwatakanibwa kwao kulombolwanga mu myanda ya ku bisanji, ilombola kwilwa kwendelela kwilwa bipwilo ne bendeji ba bipwilo. Nansha nabya, bendeji ba Babiloni Mukatakata bamwene amba kebadipo mu kyaka kya binebine. Bine i bebepele! Pa kupwa kwa lubila lwa amba “ke talala, nyā, yonka ndoe,” maludiki a kipolitike a ntanda ya Satana akalamukila kiponka na ponka mutōtelo wa bubela ne kwionakanya. Babiloni Mukatakata kakekala’kopo dikwabo! Na bubine, i biyampe tutengele na kitūkijetyima bino binkumenkume kebikedibwapo.​—Kus. 18:8, 10.

LE I MUSWELO’KA OTUKALOMBOLA KUFWIJA’KO PANGALA PA KITŪKIJETYIMA KYA LEZA?

15. Mwanda waka Yehova ukungile na kitūkijetyima?

¹⁵ Nansha bantu byobafutulula dijina dyandi, Yehova ukungile na kitūkijetyima kitatyi kifwaninwe kya kulongapo kintu. Yehova kasakengapo muntu nansha umo wa mutyima moloke onakanibwe. (2 Pet. 3:9, 10) Lelo twiivwananga uno muswelo? Kumeso kwa difuku dya Yehova kufika, tubwanya kulombola kufwija’ko pangala pa kitūkijetyima kyandi mu ino miswelo ilonda’ko.

16, 17. (a) Mwanda waka tufwaninwe kukwasha boba kebakingilanga? (b) Mwanda waka bantu kebakingilanga bafwaninwe kujokela kudi Yehova bukidibukidi?

¹⁶ Kukwasha boba kebakingilanga. Yesu wānene amba shi mukōko’tu umo mujimine ubamweka nsangaji ikalanga momwa mūlu. (Mat. 18:14; Luka 15:3-7) Bibamweka patōka’mba, Yehova utele mutyima bininge boba bonso basenswe dijina dyandi nansha shi kebamwingidilangapo bininge dyalelo. Kitatyi kyotukwasha bano bantu bajokele ku kipwilo, tusangajanga Yehova ne bamwikeulu.

¹⁷ Lelo nobe ubadilwa mu boba kebakingidilangapo Leza bininge? Padi muntu kampanda mu kipwilo wakusanshije nobe waleka’byo kutanwa ku kupwila. Byokepapite padi kitatyi, wiipangule amba: ‘Lelo pano ngidi na būmi buyampe kadi na nsangaji? Lelo i Yehova wāndubile’ni nansha i muntu wa kubulwa kubwaninina? Lelo Yehova Leza kemunonge kintu kampanda kya kunsanshija?’ Na bubine, witulongelanga nyeke bintu biyampe. Nansha shi ketwiendejangapo mungya kwipāna kotwipēne kwadi, witusakilanga tusangele bintu biyampe byaetupa. (Yak. 1:16, 17) Difuku dya Yehova disa kufika panopano ponka. Kino i kitatyi kya kujokela ku makasa a buswe a Tata wetu wa mūlu ne ku kipwilo​—kifuko kimo kete kya mutyima-ntenke mu ano mafuku a mfulo.​—Kup. 33:27; Bah. 10:24, 25.

18. Mwanda waka tufwaninwe kukwatakanya boba betwendeja?

¹⁸ Kukwatakanya na dikōkeji boba betwendeja. Yehova byadi mukumbi wa buswe, wituludikanga ne kwitukinga. Wātongele wandi Mwana bu Mukumbi Mukatakata wa luombe. (1 Pet. 5:4) Bakulumpe mu bipwilo 100000 ne kupita bakumbanga mukōko ne mukōko wa Leza. (Bil. 20:28) Kitatyi kyotukwatakanya na dikōkeji boba batongelwe kwitwendeja, tufwijanga’ko Yehova ne Yesu pa byonso byobetulongēle.

19. Le i muswelo’ka otukokeja kwiela mu milongo?

¹⁹ Kwifwena umo ku mukwabo. Le kushintulula bika? Kitatyi kitambwa kibumbo kya bashidika bafundijibwe senene na balwana, mushidika ne mushidika wielanga mu milongo, ko kunena’mba, befwenanga umo ku mukwabo. Mu uno muswelo, babundanga kibumbo kya bulwi kikomo. Satana walundila’ko bulwi bwatamba bantu ba Leza. Kino ke kitatyipo kya kwilwa batwe bene. Ino i kitatyi kya kwifwena umo ku mukwabo, kuleka kutala kubulwa kubwaninina kwa bakwetu ne kya kukulupila mu bwendeji bwa Yehova.

20. Le i bika byotufwaninwe kulonga pano?

²⁰ Batwe bonso tutengelei nyeke ku mushipiditu ne kulombola mutyima wa kukungila. Tukungilei na kitūkijetyima binenwa bya amba “ke talala, nyā, yonka ndoe” ne kutūlwa kiyukeno kwa mfulo kwa batongwe. Nanshi, bamwikeulu baná bakalekelela luvula lwa bonakani, kadi Babiloni Mukatakata ukonakanibwa. Pano potutengele kulongeka kwa bino kinkumenkume kebikedibwapo, tulondei buludiki bwa boba batongelwe kwitwendeja mu bulongolodi bwa Yehova. Twielei mu milongo ya kulwa na Dyabola ne bademona! Kino i kitatyi kya kwivwana musoñanya wa mulembi wa mitōto wa amba: “Komejai mu bidyoma, ne mutyima wenu nao ukankamane ne kukankamana, bānwe bonso bakulupile mudi Yehova.”​—Mit. 31:24.

[Kunshi kwa dyani]