Malondololo Ku Bipangujo Byenu

◼ Le I bika bifwaninwe kwifunda bana pa kusaka’mba batame ku mushipiditu?

Bambutwile bene Kidishitu bengilanga bininge pa kusaka amba batamije babo bana “na kwibalemununa ne kwibadyumuna bidyumu bya Yehova.” (Ef. 6:4) Kimfwa, bambutwile bajingulwile amba i biyampe kubandaula lubanga ne lubanga, kisonekwa kya difuku ne difuku pamo na babo bana. Mu butōtyi bwa kisaka nansha mu bitatyi bikwabo, bisaka bikokeja kutala video kamukaya ne kwisambila’po, kwisambila pa myanda kampanda idi mu bishinte Les jeunes s’interrogent, kwengelekeja mānga ya mu Bible, nansha kulonga bipindi bya kwiibidija. Inoko, pa kusaka amba bana ‘bafikile pa butame,’ bafwaninwe kadi ne kufundijibwa bubinebine bwa nkulwe bwa mu Bible. —Bah. 6:1.

Bandaula byobya byotufundija bantu botwitananga nabo mu mikenza. Musunsa’tu mubajinji nansha potulonga kujokela’mo, twikalanga’nka na kipyupyu kya kushilula kifundwa kya Bible na kwingidija dibuku Lelo I Bika Bine Bifundija Bible? Shi tubavuya kwifunda ne muntu dino dibuku, twingidijanga dibuku “Wilame mu Buswe bwa Leza.” Mwanda waka? Dibuku Bifundija Bible dipanga befundi buyuki bwa kyalwilo bwa mu Bisonekwa. Ino dibuku “Buswe bwa Leza” dibafundijanga muswelo wa kwingidija misoñanya ya mu Bible difuku ne difuku. Kwifunda ano mabuku onso abidi kukwashanga bapya “bāle miji” mudi Kidishitu, kadi “bemanije mu lwitabijo.” (Kol. 2:6, 7) Le ino myanda ibulwepo kukwasha ne betu bana? Bana nabo basakilwa kufundijibwa myanda itala kinkūlwa, Bulopwe, ne ngikadilo idi’mo bafu. Basakilwa kuyuka kine kilekēle’ko Leza masusu ne kujingulula mafuku a mfulo a ino ngikadilo ya bintu. Bafwaninwe kuyuka amba Batumoni ba Yehova bobadi mu bubinebine. Bankasampe nabo basakilwa kwivwanija misoñanya ya mu Bible ne kuyuka muswelo obabwanya kwibidija “ñeni yabo ya kujingulula bintu.” (Bah. 5:14) Na bubine, bambutwile bafwaninwe kubandaula myaka ya babo bana ne muswelo obevwanija bintu. Inoko bana bavule bekalanga na ñeni ya kushilula kwifunda bubinebine bwa nkulwe bwa mu Bible nansha’tu shi bakidi banuke.—Luka 2:42, 46, 47.