Ingidija Diteba Dyetu dya Entelenete pa Kufundija Bobe Bana
1. Le kipindi kya pa diteba dya Entelenete kinena’mba, « Enfants » kidi na kitungo’ka?
1 Diteba dyetu dya Entelenete, jw.org, i ditūlwe’ko mwanda wa kusangaja bantu ba myaka yonso. Kipindi kya pa diteba dya Entelenete kinena amba « Enfants » (twela pa Bible et Vous > Enfants) kikwashanga bana ne babo bambutwile bapwane abo bene na bene kadi bapwane ne na Yehova. (Kup. 6:6, 7) Le i muswelo’ka okokeja kwingidija kino kipindi pa kufundija bana?
2. Lelo i muswelo’ka obwanya kutonga myanda ya kwifunda na bobe bana mungya yabo myaka?
2 Kwatañanya: Mwana ne mwana udi na bisakibwa byandi pa bula. (1 Kod. 13:11) Ino le, i muswelo’ka obwanya kutonga myanda ya kufundija bana mungya yabo myaka? Wiipangule amba: ‘Le i bika bine bikasangela bami bana? Le bakebivwana senene? Le bakebilonda mu bula bwa maminite anga pambulwa kulabikwa?’ Shi bana badi na myaka isatu ne kwika, nabya ubwanya kwifunda nabo mānga idi munshi mwa kipindi, « Comptines bibliques ». Bisaka bikwabo bisangelanga mānga ya mu Bible idi mu kipindi, « Enseignez vos enfants ». Kupwa tala ne bino bipindi bilonda’ko’bi.
3. Le bambutwile babwanya namani kwingidija biyampe mānga ne kwiibidija bidi munshi mwa kipindi « Pour le culte familial » ?
3 Bya mu Butōtyi bwa Kisaka: Bino bingidilwa bidi mu kino kipindi « Pour le culte familial », i bya kukwasha mitwe ya bisaka pa kwifunda na babo bana. Pa kuyuka mwa kwingidijija mānga ne kwiibidija kukwabo, toneka pa buto pandike’mba « Télécharger », utange pa « Guide des parents ». Ingidija bwifundi bwa bifwatulo na bobwa budi pa mapaje a misombelo mwanda wa kufundija bana batyetye bininge. Ino bana batame wibakwashe na kwiibidija kushele. Kwiibidija konso i kukwatañane na mānga nansha na bufundiji bwa mu Bible, nanshi bana ba myaka yonso babwanya kulondolola’po pomudi mu butōtyi bwa kisaka.
4. Le i bika bidi mu kipindi « Deviens l’ami de Jéhovah » ?
4 Ikala Mulunda na Yehova: Mavideo, ñimbo, ne kwiibidija kukwabo bidi mu kino kipindi kya pa Entelenete « Deviens l’ami de Jéhovah », bikwashanga bambutwile bakomeneje Kinenwa kya Leza mu babo bana batyetye. (Kup. 31:12) Kipindi ne kipindi kīpi kya video ya bifwatulo bijina kidi na bufundiji bwa kamweno. Kwiibidija pamo bwa makayo a kukimba ne kutana bintu bifyame kukomenejanga kamweno ka buno bufundiji. Bana batyetye byobasenswe nyeke kwimba—ñimbo ibakwashanga bavuluke byobya byobafundile—ñimbo ya Bulopwe ne ñimbo ilembēlwe’nka bana itūlwanga’po kyaba ne kyaba.
5. Mwanda waka bambutwile bafwaninwe kulomba Yehova ebakwashe bafundije babo bana bubinebine?
5 Banwe bambutwile, Yehova wimusakila mwikale ba tata ne ba mama bayampe. O mwanda mulombei emukwashe mufundije benu bana bubinebine. (Bat. 13:8) Na bukwashi bwa Yehova, mubwanya kufundija benu bana bekale na “ñeni ya ku lupandilo pa kwitabija kwa monka mudi Kidishitu Yesu.”—2 Tem. 3:15; Nk. 4:1-4.