Ingidija jw.org mu Busapudi—“Ikala Mulunda na Yehova”

Mu kipindi kya pa jw.org “La Bible et vous” mo mudi mwanda utala bana unena’mba, “Deviens l’ami de Jéhovah” udi’mo ñimbo, mavideo, ne madevwala. Le kodi mwingidije kino kipindi mu busapudi? Shi wifundanga Bible na bambutwile badi na bana batyetye, ubulwe’po kwibalombola’byo? Kino kibwanya kwibatonona batale bikwabo bidi pa Diteba dyetu.

Tutu umo paadi wabanya Musapu wa Bulopwe No. 38, watene lolo umo, aye umupa’o, kala uno lolo washilwididila kwiutanga. Byaadi na bana bangi, nabo kebalwila kutala bidi pa trakte. Tutu wamulombola mu kīpi bidi’po ne kumufunka Diteba dyetu panyuma. Lolo’wa byaadi musangale, uno tutu wamutadija pamo ne bandi bana mavideo a Kalebu na kwingidija kakikolo ka ku makasa.

Kaka umo wadi wisamba na mwingidi-nandi udi na bana pa bitala Diteba dyetu ne myanda ya bisaka idi’po. Mwana-mukaji’wa wakatala pa jw.org pamo na bana. Kupwa, waiya kusapwila kaka amba bana badi bajokoloka njibo benda bemba lwimbo “Sapula Uno Mwanda” ludi mu kipindi “Deviens l’ami de Jéhovah.”

Wiibidije na bipindi bidi pa jw.org ne kutentwila mu kobe kakikolo mavideo, ñimbo, nansha madevwala adi’po. Nabya ukabwanya kwingidija kino kipindi kya pa jw.org mu busapudi. Bine i kingidilwa kitukwasha twikale bapika ba Mfumwetu!—Bil. 20:19.