Diteba Dyetu dya Entelenete—I Diletwe pa Kamweno Ketu ne ka Bakwabo

Yesu wētupele mwingilo wa kusapula myanda miyampe ya Bulopwe “panopantanda ponso, . . . kusapwila’yo ku mizo yonso.” (Mat. 24:14) Mwanda wa kukwasha ‘bwingidi bwetu nabo bulumbuluke, senene, shē,’ mateba etu a Entelenete etwa bu, watchtower.org, jw-media.org, ne jw.org atyangilwe onso mu diteba dimo ditwa bu jw.org.—2 Tem. 4:5.

“Panopantanda Ponso”: Kudi kubwipi kwa muntu umo pa basatu ntanda yonso bengidijanga Entelenete. I kisanji kibajinji kingidijibwa na bavule pobesambulwila myanda, nakampata ku bankasampe. Diteba dyetu dipānanga malondololo a bine ku bipangujo bya myanda ya mu Bible ku boba bengidija Entelenete. Kadi dibaludikilanga ku bulongolodi bwa Yehova ne kwibalombola muswelo upēla wa kulomba kwifunda Bible ku mobo kadi ku bitupu. Dikwashanga ku kusambakanya myanda miyampe ne mu myaba kemudi bantu na mikenga mivule ya kusapwilwa musapu wa Bulopwe pano pa ntanda.

“Ku Mizo Yonso”: Pa kupāna bukamoni “ku mizo yonso,” tufwaninwe kusapula bubinebine bwa mu Bible mu ndimi mishileshile. Boba batwelanga pa diteba dya jw.org batananga’po bukidi bonka myanda mu kintu kya ndimi 400, kupita mateba makwabo onso a Entelenete.

Ingidija Senene Dino Diteba: Diteba dipya dya jw.org keditūdilwe’kopo’nka mwanda wa kupāna bukamoni ku ba panja. I ditūdilwe’ko ne Batumoni ba Yehova bene. Shi utwelanga pa Entelenete, tukukankamika wiibidije ne na dino diteba jw.org. Londa madingi amoamo a mwa kwingidijija’dyo adi kunshi’ku..

[Tabulo pa paje 3]

(Pa kuyukila’ko bikwabo, tala dibuku)

Tompa’dyo

1 Twela pa www.jw.org mu mulongo wa mateba a Entelenete adi mu obe kompyuta.

2 Sokola bidi’mo na kutoneka pa bipindi bya mitwe ya myanda, pa kutwelela, ne pa kukwatañanya.

3 Tompa kwingidija jw.org pa kingidilwa kyobe kya ku makasa. Ukamona’mba bukata bwa bilembwa bukakwatañana na kingidilwa kyobe, ino myanda kushinta mpika.