Bipangujo bya Batangi

Mwanda waka i bipelejibwe kutūla bintu bilupwilwe na Batumoni ba Yehova pa diteba dya muntu nansha pa marezo a mīsambo pa Entelenete?

Mwanda kintu kyonso kyotulupula kimanine pa Bible tupānanga’kyo ku bitupu, ino bantu bamo balañanga’mba i bitabijibwe kwikitentula, kupwa kwikitūla pa mateba makwabo nansha pa marezo a mīsambo pa Entelenete. Inoko, kulonga uno muswelo i kutyumuna Bijila bya Mwingidijijoa bya mateba etu, kadi kino i kilete makambakano makatampe. Enka mobilombwedilwe patōka mu bino Bijila, i kutupu muntu nansha upelwe lupusa lwa “kutūla kifwatulo, mabuku, biyukeno, minjiki, mafoto, mavideo, nansha bishinte bya pa dino diteba pa Entelenete (pa diteba dyo-dyonso, pa diteba dituminwa’po myanda, pa diteba dituminwa’po mavideo, nansha pa rezo ya mīsambo pa Entelenete).” Mwanda waka bino bijila bidi na mvubu?

Bintu byonso bidi pa mateba etu kebikengidijibwapo mu muswelo mubi. Batupondo ne balwana netu bakwabo batompanga kwingidija pa mateba abo myanda yotulupula mwanda wa kongola Batumoni ba Yehova ne bantu bakwabo. Kitungo kya mateba abo i kya kulengeja batangi bekale na kutatana. (Ñimbo ya Mitōto 26:4; Nkindi 22:5) Kadi bakwabo baingidije myanda idi mu mabuku etu nansha kiyukeno kyetu kya jw.org mu bintu byobasumbija, mu bintu bya kupoteja byobalupula, ne mu mampangiko a mu telefone nansha mu tabulete. Pa kulama lupusa ne kiyukeno kyetu, twi bapebwe lupusa na Leta lwa kukankaja uno mwingidijijo mubi. (Nkindi 27:12) Ino shi tutale bantu kilomo-nyeka, enka ne banabetu, batūla myanda yotulupula pa mateba makwabo nansha kwingidija kiyukeno kyetu kya jw.org mu bya busunga, nabya Leta kaketukwatakanyapo pa bukomo botulonga bwa kujikakanya balwana netu ne matyapu a bya busunga.

Kutentula myanda yotulupwile pa mateba angi pa kyaba kya pa jw.org i kyaka kikatampe. Yehova i mupe enka “umpika mukōkele ne mudyumuke” kete lupusa lwa kulupula bya kudya bya ku mushipiditu. (Mateo 24:45) Uno “umpika” wingidijanga enka ano mateba andi ayukene kete pa kwabanya bya kudya bya ku mushipiditu​—www.jw.org, televijo ya jw.org, ne kibīko pa jw.org. Kadi tudi enka na mampangiko asatu kete ayukene a mu telefone nansha mu tabulete​—JW Language^®, JW Library^®, ne JW Library Sign Language^®. Tufwaninwe kukinga bino bintu ku bansunga nansha ku konwa na lupusa lwa ino ntanda ya Satana. Shi bya kudya bya ku mushipiditu bitambulwa kupityila ku mateba makwabo, nabya bikonwa ne kushintwa musapu.​—Ñimbo ya Mitōto 18:26; 19:8.

Kadi, kutūla myanda yotulupula pa mateba abwanya muntu kubweja’mo myanda mikwabo, i kupa batupondo ne bantu bakwabo betufutulula mukenga wa kulengeja bantu baleke kukulupila bulongolodi bwa Yehova. Banabetu bamo bekujije mu mīsambo ya lupata ya pa Entelenete, ne kino i kifutulwije bininge dijina dya Yehova. Mīsambo ya kwipatanya pa Entelenete ke muswelopo muyampe wa kufundija “boba ba lupata na kutalala.” (2 Temote 2:23-25; 1 Temote 6:3-5) Kadi twayukile amba kudi myanda ya bubela yatūdilwe pa marezo a mīsambo pa Entelenete ne kubundwa kwa mateba mu dijina dya bulongolodi, dya Kitango Kyendeji, ne mu majina a boba babundile Kitango Kyendeji. Inoko, i kutupu wa mu Kitango Kyendeji nansha umo udi na diteba dyandi nansha umwekanga pa marezo a mīsambo pa Entelenete.

Kutuma bantu pa jw.org kukwashanga pa kuzambalaja “myanda miyampe.” (Mateo 24:14) Bingidilwa bya kwingidija mu mwingilo wetu wa busapudi bitupa bulongolodi bilumbululwanga kitatyi ne kitatyi. Kadi tusakanga muntu ense amwene mu bino bingidilwa. Nanshi, monka mwikilombwela Bijila bya Mwingidijijo, ubwanya kutumina muntu bintu byotulupula kupityila ku bingidilwa bya nshinga nansha kumutumina kashinda kakamutwala pa myanda idi pa jw.org. Shi tulombola mateba etu ayukene ku bantu basangela musapu, nabya twibaluñanga na nsulo ya binebine ya bidibwa bya ku mushipiditu, ko kunena’mba “umpika mukōkele ne mudyumuke.”