Iula Kimfwa kya Bapolofeto—Zefenia
1. Le Zefenia wāingile mwingilo wa bupolofeto mu ngikadila ya muswelo’ka, ne i kimfwa kiyampe kotudi dyalelo namani?
1 Pa bukata bwa myaka ya katwa ka busamba-bubidi K.K.K., butôtyi bwa Bala bwaāndabile mu Yuda. Amone, Mulopwe mubi pa kupwa’tu kwipaibwa, ebiya nkasampe Yoshia, wābikala bu Mulopwe. (2 Bi. 33:21–34:1) Mu kine kitatyi’kya, Yehova wātuma Zefenia kusapula musapu wandi wa butyibi. Zefenia wādi wa ku kisaka kya bulopwe bwa Yuda, inoko kino kekyamukankejepo kusapula musapu wa butyibi bwa Yehova butala pa bulopwe bwa Yuda. (Zef. 1:1; 3:1-4) Batwe netu, tuloñanga bukomo bwa kwiula bukankamane bwa zefenia ne kubulwa kuleka bwana bwa mu kisaka bwitulekeje kutōta Yehova. (Mat. 10:34-37) Le i musapu’ka wāsapwile Zefenia, ne wālupwile bipa’ka?
2. Le i bika byotufwaninwe kulonga pa kusaka’mba tukafibwe mu difuku dya Yehova dya bukalabale ?
2 Kimba Yehova: Yehova bunka bwandi ye ukokeja kupandija bantu mu difuku dya bukalabale bwandi. O mwanda, Zefenia wānene Bayudea bakimbe Yehova, bakimbe boloke ne kwiubija mu kitatyi kyadi kibashadile’ko. (Zef. 2:2, 3) Mo monka ne dyalelo. Mu kimfwa kya Zefenia, netu tukankamikanga bantu bakimbe Yehova, ino tufwanine netu kulongela monka, na kusumininwa kubulwa kubadilwa mu “boba kebakimbilepo Yehova.” (Zef. 1:6) Shako, batwe tukimbanga Yehova na kwifunda na katentekeji Mwanda wa Leza ne kumulomba buludiki bwandi. Tukimbanga boloke na kwikala na mwikadilo utōka. Tukimbanga kwiubija na kukōkela bininge ne kwitabija na mutyima umo buludiki buleta bulongolodi bwa Yehova.
3. Mwanda waka tufwaninwe kulama mumweno muyampe mu busapudi?
3 Bipa Biyampe: Musapu wa butyibi wāsapwile Zefenia kewābudilwepo kukankamika Bayudea bamo, mobimwekela bavule bālondele kimfwa kya nkasampe Yoshia, wāshilwile kukimba Yehova ukidi mwanuke. Mwenda mafuku, Yoshia wāingile mwingilo mukatampe wa kutalula butōtyi bwa bankishi mu ntanda ya Yuda. (2 Bi. 34:2-5) Dyalelo nadyo, nansha shi nkunwa imo ya Bulopwe iponenanga kufula kwa dishinda, ai mu nshi ya mabwe, nansha mu miba, mikwabo nayo iponenanga mu nshi miyampe ne kupa bipa. (Mat. 13:18-23) Tukulupilei amba Yehova ukendelela kwitwesela pa bukomo botulonga mwanda wa kukusa nkunwa ya Bulopwe.—Ñim. 126:6.
4. Mwanda waka tufwaninwe ‘kukungila Yehova’?
4 Bayudea bamo bādi balanga’mba Yehova kakalongapo kintu nansha kimo. Inoko, Yehova wākulupije bantu amba dyandi difuku dikatakata didi pabwipi. (Zef. 1:12, 14) Enka boba bādi bakulupile mudi Yehova bo bādi ba kupanda. (Zef. 3:12, 17) ‘Byotukungila Yehova,’ twingilei mu bumo na banabetu botutōta nabo pamo Leza wetu mukatakata!—Zef. 3:8, 9.