Le Yehova Umonanga Namani?
1. Le Bible udingakene na kiyo muswe’ka?
1 Lelo witalanga misunsa inga mu kiyo? Bavule bene umbukata mwetu, betalanga’mo difuku ne difuku mwanda wa kwimona mobekadile ne kwinlongolola popa pasakilwa. Bible udi pamo bwa kiyo. Kutanga Mwanda wa Leza kwitukwashanga tumone mwikadile muntu wetu wa munda, mwine utalwanga na Yehova. (1 Sa. 16:7; Yak. 1:22-24) Mwanda wa Leza ubwanya “kujingulula milangwe ne mifwatakanyo ya mutyima.” (Bah. 4:12) Lelo kutanga ne kulangulukila mu Bible difuku ne difuku kubwanya kwitukwasha namani tuyuke byotufwaninwe kwilumbulula mwanda wa twikale basapudi bayampe?—Ñim. 1:1-3.
2. Lelo Bible ubwanya kwitukwasha namani twibandaule?
2 Ingidija Bible Pamo bwa Kiyo: Mānga ya bengidi ba Yehova ba kikōkeji itukwashanga tuyuke ngikadilo imusangaja. Kimfwa, Davida wāpyasakenine dijina dya Leza. (1 Sa. 17:45, 46) Isaya wāitabije kusapula na bupyasakane mu mwaba mukomo. (Isa. 6:8, 9) Yesu wādi uswele Shandi wa mūlu bininge, o mwanda wādi usangedile mwingilo wandi ne kwiuloelelwa, pa kyaba kya kwiumona bu kiselwa kilēma. (Yoa. 4:34) Bene Kidishitu ba mu myaka katwa kabajinji bādi basapula na bupyasakane, koku bakulupile mudi Yehova ne kwikala na mutyima wa kuleka’byo mpika. (Bil. 5:41, 42; 2 Ko. 4:1; 2 Tm. 4:17) Kulangulukila pa bino bimfwa, kuketukwasha twibandaule na kitungo kya kusaka kwilumbulula mu mwingilo ukola.
3. Mwanda waka ketufwaninwe kwija na kwilemununa popa potusakilwa?
3 Lemununa Bilubo: Na bubine, kebiyampepo kwitala mu kiyo ne kuvulaminwa bilubo. Tubwanya kulomba Yehova etukwashe twitale batwe bene na kitungo ne kwitukwasha twilemunune ponso potusakilwa kwilemununa. (Ñim. 139:23, 24; Luka 11:13) Kitatyi kyashala’ko byokyatyepa kadi būmi bwa bantu budi mu kyaka, ketufwaninwepo kwija pa kushinta. (1 Ko. 7:29; 1 Tm. 4:16)
4. Lelo bikekala namani kudi yewa muntu utala mu Mwanda wa Leza ne kulongela mungya byobya byasokolola’mo?
4 Muntu wa munda—mwine utalanga Yehova i wa bulēme bukatampe kutabuka mumwekelo wetu wa panja. (1 Pe. 3:3, 4) Lelo bikekala namani kudi yewa muntu utala mu Mwanda wa Leza ne kulongela mungya byobya byasokolola’mo? “Kakidipo muntu wivwana wailwa’ko, aa, ino ke wa kulonga mwingilo, kadi ukekalanga na katōkwe pa kulonga’kyo.” (Yak. 1:25) Bine, tukekala ba katōkwe ne bengidi bayampe shi ‘tumwekeje ntumbo ya Yehova pamo bwa biyo.’ (2 Ko. 3:18)