Tulumbululei Manwa Etu mu Mwingilo—Na Kwala Kyalwilo kya Kujokela’mo Kupya

Kyokwikadile na Mvubu: Shi tubatana muntu usangela musapu, tusakanga kumujokela ku yandi njibo mwanda wa kusangila mema pa nkunwa ya bubine yotwakunine. (1 Ko. 3:6) Kino kilombanga divule dine kumeso kwa batwe kutaluka, twaala bidi kyalwilo kya kujokela’mo kupya na kwilaya nandi kitatyi kyotubwanya kumujokela. Kadi i biyampe kushiya kipangujo kyotukesambila’po mu kwitana kukwabo. Kino kikakwasha mwine njibo akutengele na kipyupyu, ne shi kipangujo i kilondololwe mu dibuku dyomushidile, nabya ukasangela kutanga’dyo. Kwala kyalwilo kya kujokela’mo kupya kupēlejanga kujokela’mo mwanda mutwe wa mwanda i mutongwe kala, kadi mwinē njibo ukayuka kala bine bisa kwisambwa. Shi tubetana nandi monka, tubwanya kumushintulwila amba, tubaiya kulondolola kipangujo kyotwashile mu bupempudi bubajinji, ebiya koendelela.