Ingidija Biyampe shē Kitatyi Kyobe mu Busapudi
Batumoni ba Yehova bapityije mu busapudi mansa 1 945 487 604 mu mwaka wa mingilo wa 2014—bukamoni bulombola amba bine twi basumininwe kuvudilwa bya kulonga mu mwingilo wa Yehova! (Ñim. 110:3; 1 Ko. 15:58) ‘Kitatyi kyashala’ko byokyatyepa,’ tubulwepo kwingidija kitatyi kyetu kileme mu mwingilo na kufikila bantu bavule?—1 Ko. 7:29.
Pa kwingidija senene kitatyi kyetu mu busapudi bilomba bujalale. Kimfwa, shi uvudile kujimija nsaa mutuntulu nansha ne kupita mu busapudi kwampikwa kwisamba na muntu, le ubulwe’po kukwata’po bunwa mwa kutanina bantu bavule ne kwisamba nabo? Shako ngikadilo i mishile mungya bifuko. Inoko madingi alonda’ko akokeja kukukwasha mwa kwingidijija senene kitatyi kyobe kutyina ‘kukupila luvula.’—1 Ko. 9:26.
Busapudi bwa ku Njibo ne Njibo: Tamba myaka makumi, basapudi bekalanga na kibidiji kya kushilula lubanga na busapudi bwa ku njibo ne njibo. Inoko bikalanga bantu bavule ku mingilo yabo mu dyuba, le mubulwepo kusapula ku njibo ne njibo dyuba ke dipuluke nansha kyolwa bininge pekalanga bantu bavule ku mobo bakokolokwa? Mu dyuba, mukokeja kutana bipa biyampe na kusapwila mu mikenza nansha byaba bya busunga.
Busapudi bwa Patōkelela: Mameza ne tumatempa twa mabuku bifwaninwe kutulwa pa byaba bipityila bantu bavule mu mwaba wa kipwilo. (Tala Mwingilo Wetu wa Bulopwe wa Kweji 7, 2013, p. 5.) Shi bantu benda lwa panshi abatyepa mu mwaba utongelwe busapudi bwa patōkelela, Komite wa Mingilo wa pa Kipwilo ukokeja padi kukwata butyibi bwa kukatula tumatempa twa mabuku nansha mameza ku kyaba kipityila bantu bavule lwa panshi.
Kujokela’mo Kupya ne Bifundwa bya Bible: Le mubulwepo kutūla mpangiko ya kujokela’mo kupya ne bifundwa bya Bible mu bitatyi bikomo kutana bavule mu miswelo mikwabo ya busapudi? Kimfwa, shi busapudi bwa ku njibo ne njibo bwendeka biyampe Dya Mposo lubanga, le mubulwepo kukendeja bifundwa bya Bible mu kyolwa nansha kyolwa bininge? Po mulonga kujokela’mo kupya, le ke biyampepo basapudi bende mu bisumpi bityebitye mu myotoka mwa kusapwila bininge?
Nansha byo bifwaninwe kubala kitatyi potukishilula’tu kusapula, nsangaji yetu ikavula kutabuka shi tupa bipa. Shi ubamone amba muswelo kampanda wa busapudi kewendekapo kitatyi kampanda, tompa mu kitatyi kikwabo. Lombela Yehova, “Mwinē mwangulo,” akuludike mwa kwingidijija senene kitatyi kyobe mu busapudi!—Mat. 9:38.