Twingidijei Kitatyi Kyetu Senene

¹ Batwe bonso twikalanga na kitatyi kya buvule bumo bonka ku yenga ne yenga. Kitatyi kyotupityijanga mu kwenda kusapula myanda miyampe kidi na mvubu mikatampe mwanda twikingidijanga ku mwingilo wa kukūla būmi bwa bantu. (Loma 1:16) Tukwatakanyanga kino kitatyi na kwiteakanya biyampe mwa kutambila mu mwingilo utandikilwe ku mpangiko, na kufika ku kupwila kwa busapudi pa kitatyi kitungwe, ne na kwenda bukidi mu mwaba ukasapulwa’mo. I kipite buya kukasapula kupita’ko kulejaleja ku kupwila kwa kwenda mu busapudi. Yehova i mwitufundije amba ‘kintu ne kintu kidi ne kitatyi kyakyo kitungwe,’ o mwanda tufwaninwe kwingidija biyampe kitatyi kyotutungile bu kya kutambila mu busapudi.​—⁠Mus. 3:⁠1.

² Kwatakanya Kitatyi Kyobe Senene: Tweselwanga madyese mavule ponso potulondanga biyampe mpangiko itupa kyaba kya kutambila mu mwingilo kitatyi ne kitatyi. Divule bipa biyampe byotutananga mu mwingilo bikalanga bikwatañane na kitatyi kyotupityijanga mu busapudi. Lelo tubulwe’po kupityija kitatyi kivule mu mwingilo wa budimi na kusendulula bityetye bintu byotuloñanga nyeke? Kifwa, shi tubapu kupāna mapepala mu dya Mposo, tubulwe’po kubweja’ko kitatyi kampanda kya kulonga kujokela’mo kupya? Shi tubatambila mu mwingilo mu bula bwa kitatyi kityetye mu dya Yenga, tubulwe’po kupityija kitatyi kampanda mu kulonga kujokela’mo kupya ne kwendeja bifundwa bya Bible? Lelo ke biyampepo kupāna’ko ne bukamoni mu bipito kitatyi kyotutambila mu busapudi bwa ku njibo ne njibo? Mu uno muswelo ne mu miswelo mikwabo, tukokeja kulumbulula mwingilo wetu.

³ Shi ketutadijepo, tukokeja kujimija kitatyi kiyampe potudi mu busapudi. Eyo, shi dyuba i dinane, i biyampe kwitūkija bityetye mwa kumwena bukomo bwa kwendelela na mwingilo. Ino i biyampe kwikala’po na bujalale, mwanda ke ponsopo palombanga kwitūkija.

⁴ Mu ino myaka yotwenda nayo, ke kikomo bininge kutana bantu ku mobo abo. O mwanda basapudi bavule pano kebatambilanga mu busapudi bwa ku njibo ne njibo mu byaba bishileshile ku difuku. Lelo nobe wabulwa’po kutambila’mo ku kyolwa nansha mu kyolwa bininge?

⁵ I biyampe shi ketwisambepo bivule batwe bene na bene kitatyi kyotusapula busapudi bwa mu bipito. I kipite buya kwisubwila kyaba ne kobolola bantu mwa kushilwila nabo mīsambo. Mu uno muswelo, tukakwatakanya kitatyi kyetu biyampe shē ne kwikala na nsangaji mu mwingilo wetu.

⁶ Kwatakanya Mikenga ya Kupāna’mo Bukamoni: Muntu umo wa ku njibo walondolwele kaka Kamoni amba kebinsangejepo, ino uno kaka wamwipangula shi ku njibo kudi muntu mukwabo wakokeja kwisamba nandi. Kwamweka mwana-mulume mwinē njibo, wadi ke mwije na misongo myaka mivule, ulēle’nka mu butanda, wesamba nandi. Lukulupilo luletelwe mu Kinenwa kya Leza lwamupa kyaka kya kusaka kwikala nyeke na būmi. Kepaijijepo, walanguka mu butanda, katanwa ku kupwila ku Njibo ya Bulopwe, kasapwila ne bakwabo lukulupilo lupya lwaatene!

⁷ Kaka umo nkasampe waingidije madingi a kutambila mu busapudi nsaa imo kumeso kwa kushilula Kifundwa kya Kitabo kya pa Kipwilo. Wafika ku njibo imbajinji, wekutana mwanuke mwana-mukaji wa myaka 13, wamwivwana na kusepelela konso ne kutambula mabuku. Bukya lubanga, uno kaka wetana monka na uno mwanuke ku masomo. Ponka’po wamunena befunde nandi Bible, uno mwanuke nandi waitabija.

⁸ Lumbulula Kitatyi Kyobe: Kutambila kitatyi ne kitatyi mu mwingilo wa budimi kwitupanga muswelo wa kutamija manwa etu a kuyuka kusapula senene myanda miyampe. Lelo ukokeja kulumbulula bwino bobe bwa kushilula nabo mīsambo ku njibo na kwingidija ntwelelo mifwaninwe? Ubulwe’po kwikala mufundiji wa bwino kitatyi kyoendeja kifundwa kya Bible? Shi ulonge namino, nankyo ubaingidija biyampe kitatyi kyobe kyopityija mu busapudi, kadi ne mwingilo obe nao ukalupula bipa bivule.​—⁠1 Tem. 4:⁠16.

⁹ Būmi bwetu bufwaninwe kuvudilwa mingilo ya bwine Kidishitu, mwanda ‘kitatyi kyashala’ko ke kityetye.’ (1 Kod. 7:29) Kitatyi kyotupityija mu mwingilo wa busapudi kifwaninwe kwikala kivule kupita kyotupityija mu mingilo mikwabo yotutūdile kumeso. Nanshi tutambilei mu mwingilo na bukomo ne bupyasakane bonso. Kitatyi i kituntwa kikatampe kitupele Yehova. Twikingidijei biyampe na tunangu.

[Caption on page 4]

[Box on page 4]

Tulondei Ano Madingi:

◼ Tufikei pa kitatyi ku kupwila kwa kutambila mu busapudi.

◼ Shi kekudipo buluji kampanda, ketwakyabai bisumpi bya bantu bavule.

◼ Ketwakījai kufika mu mwaba otukasapula’mo.

◼ Tusapulei mu mwaba pakidi bantu bavule ku mobo abo.

◼ Shi kekudipo kyaka, i biyampe ne kusapula wa pandi wa pandi.

◼ Tulongei kujokela’mo kupya kubwipi na mwaba otukasapula’mo ku njibo ne njibo.

◼ Twipānei mu mwingilo kitatyi kisapula botudi nabo ku njibo kampanda.

◼ Shi bibwanika, mungya ngikadilo, tusapulei kintu kya nsaa imo ne kupita.