Twikalei Na Bwino Mu Mwingilo Wetu

¹ Diulu dibafīta fututu, mishindo ilenga nzuba nayo yenda ivula, keijike’nka ne matwi. Kintu kidi bwa dikumbi dikakuka mwishi kibatūka. Le i kika le? I kibumbo kya njie kīya kuleta musala byamwiko mu ntanda! Uno mwanda ulombwelwe na mupolofeto Yoela ufikijibwanga dyalelo na busapudi busapulwa na bengidi ba Leza bashingwe-māni ne bapwani nabo ba kibumbo kikatampe.

² Kiteba kya Mulami kya 1 Kweji 5, 1998, paje 17, kinena mu musāngo 19 amba: “Njie kibumbo ya Leza ya mu ano mafuku ilombolanga bukamoni mu ‘kibundi’ kyonso kya Bipwilo bya Ki-kidishitu. (Yoela 2:⁠9) . . . Ilandala bitupu bijika byonso byoitana, itwela mu midiyo ne midiyo ya mobo, yobolola bantu mu mikenza, īsamba na bantu ku matelefone, ne kwitana nabo mu bifuko byonso mwanda wa kwibasapwila musapu wa Yehova.” Mwene i dyese dikatampe kwingila na bengila uno mwingilo uletelwe na Leza?

³ Njie ya mu ntanda ikambakenanga’nka kudya kete, ino batwe bengidi ba Yehova tukambakenanga bininge būmi bwa boba botusapwila. Tusakanga kukwasha bakwetu befunde bubinebine bwa ntumbo butanwa mu Kinenwa kya Leza, kwibakankamika batabule matabula ebatwala ku lupandilo lwanyeke. (Yoa. 17:3; 1 Tem. 4:16) O mwanda kitusakila kuvuija mwingilo wetu na bwino. Nansha shi tubatonge muswelo kampanda wa kupāna bukamoni, tufwaninwe kwiipangula shi tusapulanga mu muswelo ne pa kitatyi kilupula bipa bilumbuluke. Tuyukile amba ‘mwikadilo wa ino ntanda walamukanga,’ o mwanda i biyampe kubandaula manwa ne misapwilo yotwingidija mwa kuyukila shi binebine tuloñanga buninge bwetu bonso mwanda wa kulupula bipa biyampe.​—⁠1 Kod. 7:⁠31.

⁴ Kulonga bukomo bwa kutana bantu mu miswelo mishileshile ya mwingilo i kuyampe shako, ino busapudi bwa ku njibo ne njibo ye kapwabijo mu mwingilo wetu nyeke. Lelo kodi mujingulule amba poendanga upempula bantu utananga bavule ku mobo kutupu’bo, pakwabo balēle? I bine, mutyima ukusansanga mpata, mwanda kwibasapwidilepo myanda miyampe! Ino le ubwanya kupwa ano makambakano namani?

⁵ Alamuna Manwa ne Kwikala na Kabango: Mu myaka katwa imbajinji, mu Isalela, babiluwe ba lui bādi bata mwita bufuku. Kitelo kya bufuku kine i kika? Na bubine kebādipo basangela kukata bufuku, inoko nakyo kyo kitatyi kyobādi bakwata mwita muvule. Kyo kyādi kikwatwa mwita kituki. Kiteba kya Mulami kya 1 Kweji 6, 1992 kyēsambile pa uno mulongelo amba: “Muswelo umo onka, tufwaninwe kwifunda mwaba wetu, twenda kupoya kitatyi kidi bantu bavule ku bikalo byabo, ne kyobakokeja kwitwivwana senene.” Bubandaudi bwa katentekeji bwa bibidiji bya bantu bulombola’mba mu bibundi bivule bya kunja ne mu mikenza ishiketwe’mo, bantu bekalanga padi ku mobo mu dya Mposo lubanga na bwē nansha mu dya Yenga lubanga, ino divule kebetwivwanangapo mu bine bitatyi’bi. Shi mo mwikadile wenu mwaba namino, lelo wabulwa’po kushilula bupempudi bobe dyuba ke dikande, nansha kyolwa? Uno o muswelo mulumbuluke wa kwikala na bwino buvule mu mwingilo wetu ne kulangila bakwetu, bine, i kilomboji kilombola buswe bwabine bwa bwine Kidishitu.​—⁠Mat. 7:⁠12.

⁶ Mutumibwa Polo wituvuluja mu Fidipai 4:5 amba ‘tufwaninwe kumwekeja kabango ketu ku bantu bonso.’ Kukwatañana na ano madingi a ku bukomo bwa mushipiditu, twikalei bajalale, babanga bakwetu, koku tusapula na bupyasakane ne buzanzamuke. Ketufwaninwepo ‘kutyina kufundija pa kitango kya bantu ne ku mobo ku mobo,’ ino twilombolei bu bantu bengila mwingilo wetu mu bitatyi bifwaninwe, bilupula bipa. (Bil. 20:20) Twiulei babiluwe bene Isalela ba mu myaka katwa imbajinji, ketwakenda ku ‘buluwe’ pa kitatyi kyotulanga batwe bene amba kyo kiyampe, ino twendei’ko pa kitatyi kikwatwa mwita kituki.

⁷ Kino kilomba kwalamuna bika ne bika? Divule dine kupwila kwa kwenda mu busapudi kupwilwanga mu dya Mposo ne dya Yenga, na 9:00 nansha 9:30 LU, kupwa banabetu batambidila mu mwingilo wa ku njibo ne njibo. Ino, bitango bikwabo bya bakulumpe bitūlanga’ko mpangiko ya kutambila mu miswelo mikwabo ya busapudi, kifwa busapudi bwa mu bipito, mu mikenza ya busunga nansha kulonga kujokelamo kupya, kumeso kwa kwenda ku njibo ne njibo mu mikenza mushikete bantu. Bipwilo bikwabo bipwilanga kupwila kwa kwenda mu busapudi lubanga dyuba ke dikande​—⁠na 10:​00, 11:00 nansha 12:00 LU. Kupwa banabetu batambila ponka na ponka mu mwingilo wa ku njibo ne njibo kufika’nka ne kyolwa. Ino mu myaba mikwabo, kyolwa kyo kiyampe kusapula kupita’ko lubanga. Kwalamuna bitatyi namino kuvudijanga bipa mu busapudi bwa ku njibo ne njibo.

⁸ Ikala na Kusansanya ne Manwa: Bantu botwitananga nabo ku njibo ne njibo betabanga ku musapu wetu mu miswelo mishileshile. Bamo betwivwana biyampe, bakwabo bapumpunya, bangi nabo betufutulula nansha kwitulwa. O mwanda dibuku “Kutoa Sababu kwa Kutumia Maandiko” pa paje 7, dituvuluja’mba ketwakakimbai “kwipatanya na bantu bampikwa kulombola bulēme nansha bumo ku bubinebine.” Shi mwinē njibo wetupanga, i biyampe kumushila kyaba. Ketufwaninwepo nansha dimo kwikokanya na bantu na kwibaningila besambe netu nansha kwitabija milangwe yetu. Musapu wetu kewakuningilapo bantu. Kulanga namino kekwendele’mopo, kadi kukaletela Batumoni bakwetu bikambija, pakwabo kukatuntumika ne busapudi bwine.

⁹ Kumeso kwa kusapula mu mwaba kampanda, i biyampe kutala kalata ka mwaba mwa kuyukila shi padi maadelese a mobo adi’ko bantu bapelele bupempudi bwetu. Shi adi’po, nankyo dyumunai basapudi bonso basapula mu kipito’kya. Kekwakekala muntu wa kukwata mpangiko ya kuketana na bano bantu pampikwa kupebwa lupusa na mutadi wa mingilo.​—⁠Tala Malondololo ku Bipangujo Byenu mu Mwingilo Wetu wa Bulopwe wa Kweji 7, 1994.

¹⁰ Tukekala na bwino shi twenda ku njibo ne njibo na kusansanya. Tutadijei biyampe kitatyi kyotulumba ku njibo kampanda. Wiipangule’mba: Lelo madidisha ne mpashila yonso i bishite? Le i kutupu ne kakikofolo kene’ni? Kepabulwe padi benē njibo balēle. Ubwanya kwisamba nabo biyampe shi ujokele’ko kitatyi kikwabo. Nanshi pano i biyampe kutabuka bidi ino njibo, kulemba’nka nimelo yayo. Ukokeja kujokela’ko kumeso kwa kwimika busapudi, nansha kulemba pantu kampanda mwa kwiila’ko kyaba kikwabo.

¹¹ Kyaba kimo ukokeja kulangula muntu nansha kumukambakanya pambulwa kusaka. Muntu ubwanya kufītwa, pakwabo wakukalabela. Lelo ukalonga’po namani? Nkindi 17:27 udingila’mba: “Yewa utalaja wandi mushipiditu i muntu wa kwivwanija [uyukile kusansanya, NW].” Eyo, ketukamwisāshilapo amba mwingilo otuvuija o mukole, mhm, ino tukamunena’tu etufwile lusa mwanda tubamufikila pa kitatyi kibi. Tukokeja kumulomba na mutyima mutūke etulombole shi tubwanya kwiya kitatyi kikwabo kifwaninwe. Binenwa biyampe, binenwa na diwi ditūkanye divule kebyo kutūkija mutyima wa mwisambi netu wa uno muswelo. (Nk. 15:⁠1) Shi muntu wakulombola’mba wingilanga bufuku, nabya lemba kakanda, wikatūle pamo na kalata ka mwaba mwa kwiila kumupempula pa kitatyi kiyampe.

¹² I biyampe kuyuka ne kusansanya mwa kusambakenya mwaba wetu ne pa mfulo. Nansha shi ketutenepo bantu bavule pa kwibapempula dibajinji, ino tufwaninwe kulonga bukomo twitane nabo mwa kwibasapwidila musapu wa lupandilo. (Loma 10:13) Dimodimo basapudi batompanga misunsa mivule mu dyuba dimo dyonka kwitana na bantu ku mobo abo. Balondakani na mobo obapempula kebatunyangapo kwikijingulula, kutadije kebatompola’mba Batumoni ba Yehova ‘kebo kuselakena ku mobo’ a mu kipito kyetu. Le tukepuka kino namani?

¹³ Yuka kusansanya. Pojokela ku njibo kowadi utene kutupu muntu, wiipangule amba, le kudi kintu kilombola’mba mwinē njibo ke mujoke? Shi ubatana mikanda nansha kakanda ka misapu kasomoke mu kakitūlo ka mikanda (shi njibo idi nako), nankyo yuka’mba mwinē njibo kaile, papo kekukidipo kiilwa kukokola monka ku ino njibo. Shi ubatompa misunsa mivule mu bitatyi bishileshile, kifwa ku kyolwa, kutana mwinē njibo mpika, nankyo mwite ku telefone. Shi bitupu, kuja trakte nansha kakanda ka lwito pantu pafyame ku kibelo, nakampata shi mwaba usapulwanga’mo divule. I biyampe kuketana na muntu’wa kitatyi kikwabo kyomukasapula mu mwaba.

¹⁴ Kokesamba na mwisambi nobe bilabila pa kibelo shi kudi mashika. Shi abakunena kutwela mu njibo, kufwaninwepo kufityija panshi. Tūkija mutyima shi kudi mbwa ukubulukila. Shi njibo yosapula’mo ikelwe na bantu bavule, nabya nena na diwi ditūke, pambulwa lunwa, shi bitupu ukakambakanya bekadi bakwabo, kadi bakayuka’mba wi mwiye.

¹⁵ Twikalei na Ndudi ne Bulēmantu: Mwilongololei biyampe na kwepuka kwiaba bisumpi bya bantu mulwi, benda kyungwija mu mwaba umo. Bantu bakokeja kutuyuka pa kumona myotoka mulwi ishīka kumeso kwa njibo yabo, nansha kisumpi kya basapudi bavule bongwila’ko. Kyotusaka i kuleka kwimwekeja bwa batwe baile “kutamba” mukenza wa bantu bulwi. I biyampe kwiaba senene ku Njibo ya Bulopwe, papwilwa kupwila kwa kwenda mu busapudi. Bisumpi bya basapudi batyetye, kifwa kisaka kimo, kebizakajangapo benē mobo, kadi bilongololwanga bipēla byonka shi mwaba wenda usambakanibwa biyampe.

¹⁶ Ndudi miyampe i ne bambutwile kuta mutyima ku bilonga babo bana kitatyi kyobadi mu busapudi. Bana batwala batame mu busapudi bwa ku njibo ne njibo bafwaninwe kumweka’mba i batamijibwe biyampe. Ke biyampepo kuleka bana batyetye bakaya nansha kunangakana koku ne koku, kutyina kukokela meso a bantu ba mu mukenza’wa nansha a bapityeshinda pobadi.

¹⁷ Kadi ikalai na bujalale mu mwanda utala kukokolokwa. Mwingilo Wetu wa Bulopwe wa Kweji 12, 1995, paje 5, unena’mba: “Padi twikalanga tujimija kitatyi kilēme na kwimika busapudi mwanda wa kukōkolokwa. Inoko, shi kūlu i kubi, kwikōkoloja kwitupanga muswelo wa kujokeja bukomo bwetu ne kwendelela na mingilo yetu. Ino basapudi bavule basenswe kusapula, kebasakangapo kwikōkoloja pamo na batutu ne bakaka bakwabo mu kitatyi kyobetungīle kusapula.” Eyo, uno mwanda utalanga muntu ne muntu bunka bwandi, ino ketudi bamone bisumpi bya banabetu bavule batutu ne bakaka betana ku mwengo nansha ku leshitola. Bajimija kitatyi pa kwilaija bebepwile byobasaka, kadi kwenda kobenda mulwi kujingijanga bampotyi bakwabo. Kyaba kimo, banabetu bekwatanga’ko na kwibangila na diwi ditunduke myanda yobamona mu busapudi bwa lubanga, kino kipēlwijanga mwingilo wetu ne kutyepeja bipa byoulupula. Basapudi badi na kusansanya bepukanga kwibunga mulwi mu leshitola kutyina kujimija kitatyi kya busapudi bitupu.

¹⁸ Basapudi bavule batananga bipa biyampe na kwisamba na bantu konso kobatanwa: mu bipito, mu biwanza bya makayo ne mu bikwe bikwabo. Kuno nako tufwaninwe kuleta’ko bukamoni bulumbuluke, ke na binenwapo kete, mhm, i ne na kwikala na kabango. Basapudi ba kipwilo ne kipwilo bafwaninwe kulēmeka mikalo ya mwaba wabo kutyina’mba bakakambakanya bantu baselakana mu mikenza ya busunga, pa bibelo bya mashinda a panshipanshi, nansha bengidi bekwete’ko na mingilo ya bufuku ne dyuba, kifwa ba ku mampompi a esanshi. Pa kuyuka’mba tuvuijanga mwingilo wetu mu ndudi, ne bya bulēme, ketufwaninwepo kukila mikalo ya mwaba wetu, poso kudi mpangiko kampanda ikwetwe na mutadi wa mingilo wa kipwilo kikwabo usaka twibakwashe mu wabo mwaba.​—⁠Tala 2 Kodinda 10:​13-15.

¹⁹ Bipwilo bimobimo bidi na mikenza mivule ikokeja kusapulwa’mo busapudi bwa kiponka na ponka. Babanyanga ino mikenza mu myaba mishileshile. Ebiya bapa musapudi nansha kisumpi kampanda kalata ka mwaba wabo wa kusapula’mo, kino kipēlejanga kusambakanya mwaba, kadi kyepeja basapudi bavule ku kusapula kya pamo mu kifuko kimo kyonka, mungya munenena musoñanya udi mu 1 Kodinda 14:40 amba: “bintu byonsololo bilongibwe monka mo byendele biyampe ne mo bīkadile.”

²⁰ Mumwekelo wetu nao ufwaninwe kwikala nyeke mulēme, wituyukanya bu bengidi baselele dijina dya Yehova. Ne bintu byotusela nabyo bilondele monka. Masakoshi a mizelomizelo ne Mabible makonyangale, masasamuke, apēlwijanga musapu wa Bulopwe. Muntu umo wanene amba muvwadilo ne mwidyangwilo wa nywene yetu “ulombolanga bukidi bonka bintu bya kwitujiudila’po ku bantu betujokolokele, ngikadilo yetu ne kifuko kyetu mu bantu bakwabo.” O mwanda muvwadilo wetu keufwaninwepo kwikala musalakane, wa biselabisela, ino wikale “mufwaninwe myanda-miyampe.”​—⁠Enzankanya na 1 Temote 2:​9, 10.

²¹ Mutumibwa Polo unena mu 1 Kodinda 9:26 amba: “Po pa mwanda o nyemena lubilo namino, ne kulangalanga mpika. Kadi nētompa mpata, kepamopo na ukupila luvula.” Netu twiulanga Polo, mwanda tusumininwe kwikala babwino, balupula bipa mu mwingilo wetu. Shi ke pano, tusapulei musapu wa lupandilo ku bakwetu, twikalei na kabango ne kusansanya pano potwenda tusapula na bupyasakane pamo ne “kibumbo kya njie” ya Yehova!