Bingidilwa Byetu bya Kufundija Nabyo
1. Lelo basapudi bene Kidishitu i beifwane namani na basendwe?
1 Sendwe wikalanga na bingidilwa palapala. Bimo bingidijibwanga’tu mu twaji twa pa bula, ino bikwabo bingidijibwanga kitatyi ne kitatyi. Basendwe ba bwino bekalanga nyeke na bino bingidilwa bya kyaba kyonso mu mbukulu wabo, kadi ye abyo byobengidijanga na bwino. Bible ukankamika mwine Kidishitu ense epāne mu mwingilo ne kwikala “mwingidi wampikwa kyafwila bumvu.” (2 Tm. 2:15) Le i kingidilwa’ka kya mvubu kutabuka mu bingidilwa byetu? I Kinenwa kya Leza—kine kyotwingidijanga mpata pa ‘kulonga bana ba bwanga.’ (Mat. 28:19, 20) Nanshi tufwaninwe kwielela’ko mwanda wa twikale na bwino bwa “kwingidija kinenwa kya bubine mobifwaninwe.” Inoko, kudi bingidilwa bikwabo mu bingidilwa byetu bya bufundiji bifwaninwe kwingidijbwa na bwino kadi kitatyi ne kitatyi na bene Kidishitu bonso pa kufundija bantu bubine.—Nki. 22:29.
2. Bingidilwa byetu bya bufundiji bwa kyalwilo i bingidilwa’ka?
2 Bingidilwa Byetu bya Bufundiji bwa Kyalwilo: Kutentekela pa Bible, lelo i bingidilwa’ka bikwabo byotufwaninwe kwingidija? Kibajinji bidi kyotufundijanga nakyo bantu bubine i Lelo I Bika Bine Bifundija Bible? Shi tubapu kwifunda na muntu dino dibuku, twingidijanga ‘Mwilamei mu Buswe bwa Leza’ mwa kumukwashisha alonde misoñanya ya mu Bible mu būmi bwandi bwa difuku ne difuku. O mwanda tufwaninwe kwikala basendwe mu kwingidija ano mabuku. Maboloshile amo nao afwaninwe kubadilwa mu bingidilwa byetu. Myanda Miyampe Itamba Kudi Leza i kingidilwa kyotushilulanga nakyo bifundwa bya Bible. Shi mu mwaba wetu mudi bantu kebayukilepo kutanga biyampe nansha boba besamba ludimi lweni loketudipo nalo mabuku mavule, papo tukokeja kwingidija Teja Leza nansha Teja Leza Amba Wikale Mūmi Nyeke. Kingidilwa kya kukuludikila nakyo botwifunda nabo ku bulongolodi i I Bāni Balonga Kiswa-Mutyima kya Yehova Dyalelo? Mavideo akwashanga pa kulonga bana ba bwanga, kimfwa Mwanda Waka Twifunde Bible?, I Bika Biloñwanga ku Njibo ya Bulopwe?, ne Dieu a-t-il un nom ?, i bingidilwa byotufwaninwe kwifunda kwingidija.
3. Manimelo akāya’ko a Mwingilo Wetu wa Bulopwe aketukwasha namani?
3 Mu manimelo akāya’ko a Mwingilo Wetu wa Bulopwe aketukwasha mwa kwikadila basendwe mu kwingidija mabuku etu a kyalwilo. Potulonga bukomo bwa kwingidija bino bingidilwa mobyendele, tukalonda ano madingi a ku bukomo bwa mushipiditu, amba: “Kyaba kyonso wite mutyima abe mwine ne bufundiji bobe. Ūminina mu bino bintu’bi, mwanda pa kulonga namino ukepandija abe mwine ne boba bakwivwana.”—1 Tm. 4:16.