Sapula ku “Bantu Bonsololo”
1. Basapudi bafike’po i beifwane namani na basendwe ba bwino?
1 Sendwe wa bwino wikalanga na bingidilwa palapala, kadi uyukile muswelo’ka ne kitatyi’ka kyakokeja kwingidija kingidilwa kimo ne kimo. Mo monka netu tudi na bingidilwa palapala bitukwasha tuvuije mwingilo wetu bu basapudi. Kimfwa miswelo ne miswelo ya maboloshile idi na mitwe ya myanda palapala, yalupwilwe mwanda wa kwitukwasha tusapwile “bantu bonsololo.” (1 Kod. 9:22) Dyani dya ntentekelo dya uno Mwingilo Wetu wa Bulopwe ditela ano maboloshile, bene ba kupa’o, ne mwa kwibapela’o.
2. I kitatyi’ka kyotukokeja kupāna maboloshile mu mwingilo?
2 Kitatyi kya Kupāna Maboloshile: Sendwe wa bwino wingidijanga bingidilwa pa kitatyi kifwaninwe. Mo monka, tukokeja kupāna boloshile shi tubamone amba binebine muntu usakilwa’ye, kebilombepo kukunga enka kweji wa kupāna maboloshile. Kimfwa shi dibuku dya kupāna i Bifundija Bible ne shi tufundija mu ntanda ke ya Bwine Kidishitu mudi bavule bapela Bible, kikekala kya kamweno kupāna boloshile mufwaninwe, pa kupwa kutamija kusangela kwandi, ke kumulombola dibuku Bifundija Bible.
3. Mwanda’ka tufwaninwe kwikala na bwino kitatyi kyotwingidija bingidilwa byetu pa kusapula?
3 Bisonekwa binenenanga maya pa boba badi na bupyasakane mu mwingilo wabo. (Nk. 22:29) Na bubine kekudipo mwingilo wa mvubu mpata kutabuka “kwingidila monka mu myanda-miyampe.” (Loma 15:16) Pa kwikala “busendwe, wampikwa ne kyāfwijibwa bumvu,” tukalonga bukomo bwa kwingidija na bwino bingidilwa byetu.—2 Tem. 2:15.