Kwasha Bantu Bateje Leza

1. Le i maboloshile’ka otwatambwile ku Kitango kya Distrike ‘Bulopwe bwa Leza Bufike!’ ne i bika bilengeje ekale bu kingidilwa kya mvubu?

¹ Ku Kitango kya Distrike ‘Bulopwe bwa Leza Bufike!’ twatambwile’ko maboloshile abidi, anena’mba Teja Leza Amba Wikale Mūmi Nyeke ne mukwabo mwīpipijibwe, unena’mba Teja Leza. Byoadi na bilembwa bityetye, apēla kwalamunwa kadi bya bukidibukidi. Na bubine, boloshile Teja Leza Amba Wikale Mūmi Nyeke wanenwe kwalamunwa mu ndimi 431 tamba na poalupwidilwe mu Angele.

2. Le i ani nakampata ukamwena mu ano maboloshile?

² Le i ani nakampata ukamwena mu ano maboloshile? Tala ino myanda imwekanga divule ntanda yonso:

• Musapudi wesambe na muntu, shi mu kwitana kubajinji shi mu kujokela’ko kupya, ino wajingulula amba muntu’wa kafundilepo nansha amba udi na makambakano pa kutanga.

• Musapudi usapwila muntu wisamba ludimi lotupwile kwalamuna’mo kala mabuku matyetye nansha mutupu. Nansha shi mu mwaba bantu bakolelwanga kutanga ludimi lobayukile’ko kwisamba.

• Musapudi usapula mu ludimi lwa batumama badi mu mwaba wabo.

• Mbutwile usaka kufundija wandi mwana mutyetye myanda ya Leza, ino mwana mwine kayukile kutanga.

3. Le boloshile Teja Leza i muteakanibwe namani?

³ Moateakanibwe: Boloshile Teja Leza udi na bilembwa bityetye mpata, divule na milongo mīpi ne na bisonekwa kunshi kwa paje ne paje, bine bikomeneja mwanda wisambilwa’po. Mwanda waka? Fwatakanya’po bidi shi muntu wakupe boloshile mulembwe mu ludimi lokuyukile nansha ludi na masomo a muswelo mukwabo. Nansha shi idi na bifwatulo biyampe, le ukeisangela bine? Nalanga’mba kukasangela’yopo. Mo monka, muntu kayukile kutanga ubwanya kutuyulwa na bitabo bidi na bilembwa. O mwanda, pa paje ne paje padi bifwatulo bilongolwelwe senene ne kaketo kalombola pa kifwatulo kya kwenda’po shi mubapu kwisambila pa kifwatulo kibadikile.

4. Le boloshile Teja Leza Amba Wikale Mūmi Nyeke i muteakanibwe namani?

⁴ Boloshile Teja Leza Amba Wikale Mūmi Nyeke udi na bifwatulo bya muswelo umo’nka na byobya bidi mu boloshile Teja Leza. I mulupulwe mwanda wa kwifunda na boba kebayukilepo kutanga biyampe nansha bakifunda kutanga. Boloshile Teja Leza Amba Wikale Mūmi Nyeke ukokeja kwingidijibwa na mwadimu kitatyi kyobefunda na muntu udi na boloshile Teja Leza. Pa mapaje onso abidi, padi bilondololwa bilondolola kipangujo kidi kūlu dya ku difinko kwa paje wa ku lunkuso. Pa bifwatulo bidi’po padi ne bushintuludi ne binenwa bya mu bisonekwa. Kunshi kwa mapaje mavule dya ku difinko padi kapango kasabūke kadi na myanda ya ntentekelo ne bisonekwa bikokeja kwisambilwa’po mungya bukomo bwa mwifundi.

5. I kitatyi’ka ne muswelo’ka otukokeja kupāna ano maboloshile?

⁵ Mwa Kwiengidijija: Shi ubamone amba i kyendele’mo ukokeja kupāna ano maboloshile, posapula ku njibo ne njibo nansha shi ano maboloshile keanenwepo kupāna mu mwine kweji wa. (Tala kapango “Mwa Kupānina Ano Maboloshile.”) Ukokeja kumupa’ye mu kujokela’mo kupya na kunena’tu mba: ngidi na kintu’tu kimo kya kukulombola, kupwa mutambike’ye.

6. I muswelo’ka otukendeja bifundwa bya Bible na kwingidija ano maboloshile?

⁶ Boloshile Teja Leza byakadipo na bipangujo, o mwanda mīsambo keikekala’po ya bipangujo ne malondololo na mwifundilwanga na muntu mu dibuku Bifundija Bible. Mu bibidiji bivule, bantu basangelanga kuteja mānga. O mwanda ingidija bifwatulo pa kusekununa mānga isonekelwe mu Bible. Shintulula kine kyengelekejibwe na kifwatulo’kya. Nena na nsangaji. Nena mwifundi ajingulule bidi’po. Tanga bisonekwa bidi kunshi kwa paje ne kulanguluka nandi pa binena bisonekwa. Mwipangule bipangujo bimulengeja anene’po mwa kujingulwila shi waimvwanija’byo. Shi udi na boloshile Teja Leza Amba Wikale Mūmi Nyeke, tanga nandi pamo binenwa ne bisonekwa bikwatañene na kifwatulo ne kifwatulo kyomwisambila’po.

7. I muswelo’ka otukokeja kukwasha mwifundi wa Bible endelele kumeso?

⁷ Kwasha Mwifundi Endelele Kumeso: Tukulupile amba mīsambo yenu ikalengeja mwifundi ekale na mutyima wa kuyuka kutanga amba efunde kwiyukila Yehova aye mwine. (Mat. 5:3; Yoa. 17:3) Kadi shi mwifundanga mu boloshile Teja Leza, padi ukafundija mwifundi muswelo wa kutanga, kupwa ke musambukila mu boloshile Teja Leza Amba Wikale Mūmi Nyeke. Nansha mwifunde shi mu boloshile’ka, mwifundi kakabatyijibwapo amba mwanda’po mubapu kwifunda’o. Mukokeja kusambulukila mu dibuku Bifudija Bible nansha mu dibuku dikwabo diyampe dikamukwasha emvwanije Bible.

8. Mwanda waka ubafwija’ko pa bino bingidilwa bipya bya mu busapudi?

⁸ Shi muntu usaka kumona būmi bwa nyeke, ufwaninwe kuteja Mfumu wa diulu ne ntanda. (Is. 55:3) Kadi Yehova usakila “bantu bonso,” kubadila’mo ne boba kebayukilepo kutanga, befunde mwa kumutejeja. (1 Tem. 2:3, 4) Bine tufwija’ko pangala pa bino bingidilwa bipya bya kufundija nabyo bantu bayuke mwa kutejeja Leza!

[Kapango pa paje 3]

Mwa Kupānina Ano Maboloshile

Lombola mwisambi nobe paje 2-3, ne kunena’mba: “Le ukasangela kwikala mu ntanda idi na ino’i? [Muleke alondolole.] Bisonekwa i bilaye [nansha amba dino dibuku dijila i dilaye] amba Leza usa kunengeja panopano ino ntanda, kwiyalamuna ke kifuko kya ndoe, ya kubulwa’po bulanda ne misongo. Tala byotufwaninwe kulonga mwanda wa kukekala’mo. [Tanga Isaya 55:3, utelelwe pangala pa paje 3.] Kino kitwita ‘twende’ kudi Leza ne ‘kumuteja.’ Ino le tubwanya kuteja Leza namani?” Alamukilai pa paje 4-5 ne kwisambila pa malondololo adi’po. Shi kadipo na kitatyi, mushile boloshile ne kumulaya mwiye difuku dikwabo kwisambila pa malondololo.