Mwāletēle Umpangi Milao Yandi ya Buswe

Tamba bantu bapangibwa, Umpangi wetu wādi wisamba na bantu kupityila ku bamwikeulu ne bapolofeto. Ne kadi, wāsakile kulembeja musapu ne milao yandi. Ino milao ya Leza itala ne būmi bobe bwa kumeso. Le i kwepi kobwanya kutana milao ya Leza dyalelo?

Musapu witupele Leza udi mu Bisonekwa Bijila. (2 Temote 3:16) Lelo Leza wāingidije bapolofeto namani balembe musapu wandi? (2 Petelo 1:21) Leza wāpele balembi milangwe yandi, ebiya nabo beilemba. Ye mobikadile ne dyalelo. Shi mukulu wa kaji wanena mulembi amulembele mukanda, tuketabija’mba mwine mukanda i mukulu wa kaji. Mu muswelo umo onka, Leza nandi wāingidije bantu balembe musapu wandi, ino aye ye Mwinē Bilembwa Bikola.

KINENWA KYA LEZA KIDI KONSOKONSO

Musapu wa Leza udi na mvubu bininge, o mwanda usakanga bantu bonso beutange ne kwiwivwanija. Dyalelo yandi “myanda miyampe ya nyeke” idi ku “mizo yonso ne bisaka ne ndimi.” (Kusokwelwa 14:6) Na bukwashi bwa Leza, Mabible adi’ko matuntulu nansha bipindi mu ndimi 3 000 ne kupita, mavule kutabuka dibuku dyo-dyonso didi’ko pano pa ntanda.