Umpangi Wetu wa Buswe Witutele Mutyima

1. UMPANGI WETU UTAMBIJANGA DYUBA

Molangila, le būmi bwadi bwa kwikala namani pano pa ntanda shi kekwadipo kitōkeji kya dyuba? Dyuba dipanga mityi bukomo bwa kulupula mani, maluba, bipa, ntole ne nkunwa. Kadi dikwashanga mityi ikoke mema a panshi kupityila ku miji, afika ne ku mani, kupwa akanda mūlu na kipuinga.

2. UMPANGI WETU UNOKEJANGA MVULA

Mvula i kyabuntu kilēme kitupele Leza, kikwasha nshi itulupwile bya kudya. Leza i mwitupe mvula wa mūlu ne bitatyi bya kupa bipa, bine bituletela bya kudya ne kuyuja nsangaji mu mityima yetu.

3. UMPANGI WETU WITUPANGA BYA KUDYA NE BIVWALWA

Bashabana bavule bazumbijanga mutyima pa mwa kusokwela bya kudya ne bya kuvwika ba mu bisaka byabo. Bible unena’mba: “Talai senene toni twa mūlu; ketukusangapo nkunwa nansha kwangula ne kubīka mu bibīko kwine mpika, ino Shenu wa mūlu witudishanga. Mwene banwe mudi na mvubu kwitupita?”​—Mateo 6:25, 26.

“Boilai ñeni ku maluba a mu ntanda moataminanga . . . ; ino nemulombola’mba nansha ke Solomone mwine mu ntumbo yandi yonso kāvwelepo bya kufwaninwa pamo na diluba dimo dya mu ao. Penepo shi Leza uvwika namino munamuna ya mu ntanda . . . , abulwe’po kwimuvwika kutabuka?”​—Mateo 6:28-30.

Leza byabwanya kwitupa bya kudya ne bivwalwa, ubwanya ne kwitukwasha tusokole bintu bikwabo byotusakilwa mu būmi. Shi tusaka kulonga kiswa-mutyima kya Leza, uketwesela pa bukomo botulonga bwa kutamija bya kudya ne kwitukwasha tusokole kaji ka kwitukwasha tupote bintu byotusakilwa.​—Mateo 6:32, 33.

Bine, tudi na bubinga bwendele’mo bwa kusanshilwa Leza potulangulukila pa dyuba, mvula, byoni, ne pa maluba. Kishinte kilonda’ko kikesambila pa muswelo wisambanga Umpangi wetu na bantu.