Umpangi Wetu Mukatampe Witutele Mutyima!

¹ Yehova wātompele kulanguluja bene Isalela bakubulwa kikōkeji, wēbepangula’mba: “Lelo kuyukilepo’ni? Lelo kwaivwenepo, a? Leza wa nyeke ne nyeke, Yehova mupangi wa mafulo a panopanshi.” (Is. 40:28) Tuyukile biyampe Umpangi wetu Mukatampe kadi tumonanga ne muswelo waetutele mutyima na buswe. Ino kudi bantu bavule bene batatana kwikala’ko kwandi, pakwabo bamumwene mu muswelo mukwabo keukwatañene na bifundija Bible. Lelo tukokeja kwibakwasha namani?

² Dibuku dipya Y a-t-il un Créateur qui se soucie de vous? i dilupwilwe kukwasha bantu ba uno muswelo. Dikwasha bantu ba ñeni mibwane balanguluke pa myanda yabine. Myanda isangaja ne milangwe mipotoloke idi mu dino dibuku ikakoka batangi byabinebine.

³ Tupotololei Biyampe Dibuku Créateur: Tulamei bidi milangwe mikatampe īsambilwe’po mu dino dibuku. Tamba pa shapita 2 kutūla ku 5, i besambile pa muswelo wāikele’ko umbuo wa diulu ne ntanda, būmi ne muntu, ne nsulo kobyāsulukile. Tamba pa shapita 6 kutūla ku 9, besambila pa Bible ne pa Mulembi wandi, nakampata pa kikulupiji kyotufwaninwe kwikala nakyo mu nsekununi ya bupangi isekunwinwe mu Ngalwilo. Shapita wa 10 uleta malondololo mafike’po ku kimo kya mu bipangujo bikutakane biipangulanga bantu, amba: “Shi bine kudi Umpangi witutele mutyima, mwanda waka kudi masusu mavule namino?”

⁴ Tutompei Kulanguluka na Boba Batatana: Pa paje 78-79 mu dibuku Créateur patanwa mwanda muluji okokeja kwingidija mwanda wa kukwasha bantu bekale na milangwe myoloke padi Leza. Wibepangule amba: “Lelo umbuo wa diulu ne ntanda udi na ngalwilo?” Bavule baketabija’mba i amo, udi nayo. Kupwa ipangula’mba: “Lelo ino ngalwilo yēshilwile ayo mine’ni nansha kudi kyēishilwile?” Bavule betabijanga’mba kudi kyēishilwile. Ebiya ipangula kipangujo kya mfulo amba: “Le kyāshilwile ngalwilo i kintu kampanda kyanyeke’ni nansha i muntu kampanda wanyeke?” Ntwelelo ya uno muswelo ibwanya kukwasha bantu bavule bajingulule’mba nanshi Umpangi udi’ko bine.

⁵ Dibuku Créateur didi na mvubu mpata ku bantu bavule. Pāna’dyo ku balongo bobe, bantu boingila nabo, balunda nobe ba ku masomo, ne bantu bakwabo bomwiyukile nabo. Paya’dyo potambila mu busapudi mwa kupānina’dyo ku boba batatana kwikala’ko kwa Leza. Wivwane tupotolole dino dibuku senene, nankyo ne buswe botuswele Umpangi wetu bukekala bukomo, kino kiketutonona twendelele kunangila mu misoñanya yandi ya buya bwa dyangi.​—⁠Ef. 5:1; Kus. 4:⁠11.