BŪMI BWA BENE KIDISHITU
Tana Nsangaji mu Kusapula Myanda Miyampe
Le kodi mumone’mba i bikomo kusapula? Bavule babwanya kulondolola’mba i bikomo. Mwanda waka? Mwanda padi tulwanga kyaba ne kyaba na bujundu ne lwana mu mwaba wetu, nansha padi tudi na moyo wa kwisamba na bantu bo ketuyukilepo. Na bubine, ino myanda ibwanya kutyepeja nsangaji yetu. Ino tutōtanga Leza wa nsangaji witusakila tumwingidile na nsangaji. (Ñi 100:2; 1Tm 1:11) Le i bubinga’ka buyampe busatu bwa kusangela kusapula?
Bubajinji, tusapulanga musapu wa lukulupilo. Nansha lukulupilo byo lwatyepa mu bantu dyalelo, tubwanya kuyuja mityima ya bantu na “myanda miyampe ya dyese.” (Isa 52:7) Inoko, myanda miyampe ya Bulopwe bwa Leza ibwanya netu kwituyuja nsangaji. Kumeso kwa kwenda mu busapudi, langulukila pa madyese akaleta Bulopwe bwa Leza pano pa ntanda.
Bwa bubidi, myanda miyampe yotusapula ikwashanga bantu ku ngitu ne ku mushipiditu. Befundanga kuleka bilongwa bibi ne kwikala na lukulupilo lwa būmi bwa nyeke. (Isa 48:17, 18; Lo 1:16) Twimonei bu twingilanga mwingilo wa kukimba ne kupandija. Nansha bantu bamo byo kebasakengapo kupanda, batwe tukimbanga boba bafwaninwe.—Mat 10:11-14.
Bwa busatu kadi bwa mvubu mpata, busapudi bwetu bulēmekejanga Yehova. Umwene na mvubu bininge mwingilo wetu wa kupāna bukamoni. (Isa 43:10; Bah 6:10) Ne kadi, witupanga na mutyima umo mushipiditu wandi ujila mwa kubwaninya uno mwingilo. Shi ke pano, lomba Yehova nsangaji, kipa kya mushipiditu ujila. (Ngt 5:22) Na bukwashi bwandi, tukakomena kuzumbija mutyima kwetu kadi tukasapula pampikwa moyo. (Bil 4:31) Tukatana nsangaji mu mwingilo wetu wa busapudi, nansha shi bantu ba mu mwaba wetu bapēla musapu.—Ezk 3:3.
Le i ngikadila’ka yosenswe kumwekeja mu busapudi? Le ubwanya kumwekeja nsangaji namani?
TALAI VIDEO ALUJA NSANGAJI NA KWIFUNDA NE NA KULANGULUKA, KUPWA LONDOLOLAI KU BINO BIPANGUJO:
Mwanda waka tufwaninwe kubadikija bibidiji byetu bya kwifunda kumeso, nansha shi tusapulanga mansá mavule kweji ne kweji?
I muswelo’ka otubwanya kwiula Madia?
Le i kitatyi’ka kyo witūdile’ko mwanda wa kulangulukila pa Kinenwa kya Leza?
I bika bikuletelanga nsangaji po sapula myanda miyampe?