Tusangelei Madyese a Nyeke a Umpangi Wetu

Leza wālaile mupolofeto Abalahama amba, muntu umo wa ku lutundu lwandi ukaletela “mizo yonso ya pano panshi” madyese. (Ngalwilo 22:18) Le uno muntu i ani?

Pano ke padi myaka 2 000, Leza wāpele Yesu, mwine wa ku lutundu lwa Abalahama, bukomo bwa kulonga bingelengele bikatampe. Bino bingelengele byālombwele amba mulao obālaile Abalahama wādi wa kufikila ku mizo kupityila kudi Yesu.​—Bene Ngalatea 3:14.

Bingelengele byālongele Yesu byāmuyukenye bu muntu utongelwe na Leza mwanda wa kwesela bantu, kadi byālombwele muswelo ukamwingidija Leza mwanda wa kwesela bantu nyeke ne nyeke. Tala mulombwela bingelengele bya Yesu ngikadila yandi imoimo isangaja.

Kanye​—Yesu wābelwile misongo.

Difuku dimo, muntu wa makopo wāzenzele Yesu amubelule. Yesu wāmutenga, wānena’mba: “Nsakile!” Ponkapo makopo apwa.​—Mako 1:40-42.

Buntu​—Yesu wādishishe bantu bādi na nzala

Yesu kādipo usaka bantu bekele na nzala. Divule dine, wāvudije mikate mityetye ne twita twa lui mwanda wa kudisha mu kingelengele bantu tununu ne tununu. (Mateo 14:17-21; 15:32-38) Pa kupwa kudya, bonso bāikuta kwashala ne byakudya bivule.

Lusa​—Yesu wāsangwile bafwe

‘Pa kwivwana lusa,’ Yesu wāsangwile mwana umo kete wa mukaji wa kishala mwine kādipo na muntu mukwabo wa kumulela.​—Luka 7:12-15.