Ingidija Mavideo pa Kufundija Bowifundanga Nabo Bible

Bintu bya kutadila’ko bikwashanga yewa utala evwanije ne kuvuluka byaefundile. Yehova, wetu Mufundiji Mukatakata, wāingidije bintu bya kutadila’ko pa kufundija bufundiji bwa kamweno. (Ngo 15:5; Yel 18:1-6) Kadi ne Yesu, Mufundiji Mukatampe nandi wēbingidije. (Mat 18:2-6; 22:19-21) Muswelo umo wa bintu bya kutadila’ko wingidijibwa bininge mu ino myaka i mavideo. Le wingidijanga senene mavideo pofundija boba bowifundanga nabo Bible?

Kwateakanibwe mavideo dikumi pa kwitukwasha tufundije myanda idi mu boloshile Myanda Miyampe Itamba Kudi Leza! Pavule, mutwe wa mwanda wa video ne video i mukwatañane na kipangujo kampanda kityite kidi mu boloshile. Boloshile utangilwa mu bingidilwa bya nshinga udi na tushinda twitutwala ku video, kadi twituvuluja kitatyi kya kutadija video ne video. Kadi, mavideo makwabo adi na myanda imo keidipo mu mabuku meshileshile otufundijanga nao a mu byetu Bingidilwa bya Kufundija Nabyo.

Lelo mwisambilanga pa mwanda wa mu Bible ukomena omwifundanga nandi kwivwana? Nansha le omwifundanga nandi ulwanga na ditompo kampanda? Nabya kimba mavideo adi pa jw.org® ne a pa Televijo ya JW®, utale yoya ibwanya kumukwasha. Padi abe ne yewa omwifundanga nandi mubwanya kutala’yo pamo ne kwisambila’po.

Kweji ne kweji kulupulwanga mavideo mapya. Powiatala, langulukila pa muswelo obwanya kwiengidija pa kufundija bantu.