Ingidija bya Kutadila’ko Bifundija
1. Yehova wāingidije namani bya kutadila’ko pa kufundija bengidi bandi ba pa kala, ne byēbatengele namani?
1 Yehova pa kufundija bengidi bandi ba pa kala myanda ya mvubu, wādi wingidija bimonwa ne bilotwa. Langa’po bidi kimonwa kya Ezekyele kya dikalo dya Yehova dya mūlu. (Ezek. 1:1-28) Fwatakanya kadi mweivwanine Danyele pa kupwa kulota kilotwa kya bupolofeto kya mwilondela imbikalo ya ntanda. (Dan. 7:1-15, 28) Le ulanga namani pa kusokwelwa kusangaja kwa ‘biyukeno’ byāmwene mutumibwa Yoano bya mukapityila bintu “mu difuku dya Mfumwetu”? (Kus. 1:1, 10) Bine, Yehova wēbafundije na kwingidija bintu bya misombelo ne bikomo kwilwa, byāshele mu ñeni yabo mafuku mavule.
2. I bya kutadila’ko’ka byotukokeja kwingidija pa kufundija bakwetu bubinebine?
2 Shi tusaka kukoma bubinebine bwa mu Bible mu bakwetu kutyina bakelwa’bo, nabya twingidijei mabande video afundija. Mabande etu a video adi na mitwe ya myanda mishileshile kadi atamija kikulupiji mu Bible, mu bulongolodi bwa Yehova, ne mu misoñanya ilumbulula būmi bwa Bwine Kidishitu. Ivwana bidi miswelo ibala-inga ya mwa kwingidijija mabande etu a video afundija. Tala pa kulondela kunshi’ku motukokeja kwingidijija mabande a video amoamo.
3. I bika byokokeja kwingidija mwanda wa kukokela omwifunda nandi Bible ku bulongolodi?
3 Mu Busapudi: Le kodi mulombole muntu omwifunda nandi Bible mwikadile bubutule bwetu bwa Bwine Kidishitu ntanda yonso? Mulombole mobwikadile na kumutadija bande wa video Toute la communauté des frères. Ukokeja kumwajimija atale’yo kumeso kwa kwiya kwifunda kifundwa kikwabo nansha kutala nandi pamo pomusa kwiya kwifunda. Ebiya kupwa kemupituluka mu bipangujo bitanwa mu Mwingilo Wetu wa Bulopwe wa Kweji 6, 2002.
4. I bingidilwa’ka bibwanya kwingidija Batumoni bankasampe ku masomo?
4 Banwe bankasampe, mukokeja kulombola badimu benu nansha kalasa katuntulu mabande a video La fermeté des Témoins de Jéhovah face à la persécution nazie ne Fidèles dans les épreuves —Les Témoins de Jéhovah en Union soviétique. Mubwanya kuteakanya bipangujo pa papye mu byobya bitanwa mu Mwingilo Wetu wa Bulopwe wa Kweji 6, 2001 mungya mīsambo yenu ya mu kalasa.
5. Bambutwile babwanya kwingidija bika mu bifundwa byabo bya bisaka?
5 Na Kisaka Nansha na Balunda: Banwe bambutwile, i difuku’ka dya mfulo dyomwatadile na benu bana bande wa video Les jeunes s’interrogent. . . Comment se faire de vrais amis ? Mwene mukokeja kwiitala monka mu kifundwa kyenu kya kisaka kilonda’ko? Mwingilo Wetu wa Bulopwe wa Kweji 10, 2002 wadi na bipangujo biyampe ne mīsambo itobala.
6. Le ukalonga namani shi usaka mwiubake pomwitana na bakwenu pamo?
6 Lelo udi na balunda mu kipwilo bosaka kwita bāye kukupempula kobe? Nabya talai nabo pamo bande wa video Respectons l’autorité de Jéhovah mwa kwiubakila kyolwa’kya, nakampata shi pa kupwa kutala, mupituluke ne mu bipangujo bidi mu Mwingilo Wetu wa Bulopwe wa Kweji 9, 2004.
7. I mikenga’ka mikwabo yokokeja kwingidija’mo mabande etu a video?
7 Mikenga Mikwabo: Le kudi mukwabo ubwanya kubandila bande wa video umo mu mabande etu 20 meshileshile? Mwene ukokeja kulombola bande umo nansha abidi ku bantu bopempulanga nyeke amba bendelele ku mushipiditu? Lelo kubwanyapo kupa muñanga wa mwenu bande umo wa video nansha kushila’ye njibo imo ilelwa’ko banunu? Le mabande a video abulwe kunekenya mulongo, mwinē pobe, mulondakani, nansha mwingidi nobe ke Kamonipo wa Yehova? Mabande etu a video i asangaja, ōbaka, kadi i bya kutadila’ko bya kamweno. Ingidija’o pa kufundija.